Почина Ајри Демировски, автор на „Битола мој роден крај“

[Andonov Bale]

Утрово во Битола од Турција пристигна тажната вест, дека синоќа во Измир, во семејниот дом, на 83-годишна возраст, почина Ајри Демировски, творецот на најопеаната и најпозната битолска песна „Битола мој роден крај“.

Демировски пред две години беше прогласен за прв почесен граѓанин на Битола, а хроничарите го нарекоа најголем битолски гениј, кој со своето творештво во областа на новосоздадената изворна македонска народна музика, родниот град го направи познат во целиот свет.

„Како што кажуваше во своите стихови и во своите песни, секогаш и со срцето и со душата беше со Битола. Иако толку години беше далеку во Турција, секогаш живееше и дишеше со сите нас“, рече Владимир Талески, градоначалник на Битола.

За Ајри Демировски, продукциската куќа И-Ес-Ер од Истанбул, подолго време подготвуваше документарен филм, кој во финалната фаза се снима и во Битола, а екипата денеска беше затекната од тажната вест.

„Утрово дознавме за тажната вест и сега немаме зборови за нашата тага, зашто при снимањето на документарниот филм, целосно се внесовме во неговата убава приказна, но и потресна судбина“, рече Јасин Али Туркери, продуцент на ESR од Истанбул.

Ајри Демировски во Битола го учеше берберскиот занает, а со своите песни што за прв пат ги испеа на брановите на Радио Битола, стана познат во целиот свет.

На младост замина во Турција, но последниве години, иако со нарушено здравје, често доаѓаше во родниот град, срдечно пречекан од пријателите и другите сограѓани.

 

[..........]

Еј навистина..голем човек голем македонец.....нека почива во мир:smir:

 

[Ајсшутер]

Нека почива во мир.

 

[Jack Bauer.]

Лека му земја...нека почива во мир...

 

[Andonov Bale]

ДЕМИРОВСКИ АЈРИ( музичар )
Демировски, Ајри (1927), автор на песната „Битола, мој роден крај". Роден е во Битола. По ослободувањето Ајри Демировски бил првиот испратен ученик од Битола во Загреб во графичкото училиште да го изучува печатарскиот занает. Но, во Битола тој никогаш не работел како печатар. Се вработил како чувар во Радио Битола. Работејќи во радиото имал несекојдневна прилика редовно да ги слуша во живо најпопуларните битолски и македонски пејачи. Тоа го поттикнало да почне да размислува во насока на создавање на нова македонска музика. Ајри Демировски има компонирано над педесетина песни. Негови се популарните: „Мариче ле лично девојче", „Таму ле мајко близу Битола", „Само ти се чудам Цвето", „Сношти те Маре сонував", „За кого ти цути Дано лицето"„Денот ми наблиза на гурбет да заминам" и многу други, за кои многумина мислат дека се народни, бидејќи се општоприфатени и пејани. И секако најпопуларната меѓу нив, неговата антологиска песна „Битола, мој роден крај", песна во која ја опеал својата огромна љубов кон родната Битола, песна која претставува неповторлив музички симбол и по која Битола ја препознаваат и распознаваат. Битолчани оваа песна ја прогласија за песна на векот, а нејзиниот автор Ајри Демировски за почесен граѓанин на Битола.

БИТОЛА - „Срцето двапати ми е откорнато. Еднаш во 1955 година кога заминував од Битола и уште еднаш кога од Истанбул заминував за Измир. Ама срцето ми остана во Битола“. Така вели Ајри Демировски, автор на песната „Битола, мој роден крај“, песна која во 2000 година битолчани ја избраа за песна на векот. И со право, зашто тоа е песната што ја прослави Битола во светот. По предлог на советникот Марјан Танушевски, Советот на Општината на 14 мај годинава го прогласи Ајри Демировски за прв почесен граѓанин на Битола. Општинска делегација минатата недела му го врачи високото признание на свечена церемонија во Кабинетот на градоначалникот на Општина Каршијака во Измир, Џеват Дурак.



„Многу се возбудив. По толку години моите сограѓани, битолчани, докажаа дека не ги заборавиле моите заслуги и се сетија на мене“, вели Демировски, кој има чуден животен пат. Роден е во Битола во 1927 година. Неговиот татко, кој потекнувал од старо битолско семејство, бил оџа. Но, Ајри останал без високо образование. Чиракувал, бил печатарски работник, а работел и во Радио Битола, каде што ја напишал песната „Битола, мој роден крај“. Оваа песна, но и другите – „Болен лежи млад Стојан“, „Цветините очи черешови“, „За кого ти цути, Дано, лицето“ ги пеел во живо преку брановите на најстарото локално радио во Македонија. Вели дека се откажал од авторството и сега се пеат како народни. Во 1955 година, прогонет, заминал од Битола за Стамбол, Турција. Сега, во осмата деценија од животот, е во Измир, каде што, заедно со 800.000 Mакедонци-иселеници, колку што живеат таму, често се сеќава на родниот крај и со многу емоции ги пее песните што ги напишал.

„Имам и нови песни. Кога ќе дојдам во Битола, сакам да му ги предадам на градот. Песните што ги посадив сакам да никнат таму. Како осумдесетгодишен човек мислам дека тие ќе живеат во наредните 800 години“. Демировски е сигурен дека со признанието што го добил од битолчани му се продолжил животниот век. Со носталгија вели: „Битола е мојот роден крај. Друг немам. Ниту еден човек на светот нема две родни места, освен едно... А поубава од Битола, чинам, нема во светот...“

Битола, мој роден крај

Битола, мој роден крај,
Во тебе сум роден,
За мене си рај.
Битола, мој роден крај,
Јас те сакам од срце, знај.
Битола, мој роден крај,

Јас те сакам, за тебе пеам.

Многу градови, села пројдов,

Како тебе Битола, нигде не најдов.

Битола, мој роден крај,

Јас те сакам од срце, знај.

Битола, мој роден крај,

Јас те сакам, за тебе пеам.

Еј, роден крај, кој би можел,

Збогум да ти рече, да не заплаче.

Битола, мој роден крај,

Јас те сакам од срце, знај.

Битола, мој роден крај,

Јас те сакам, за тебе пеам.
​

Слава му​

 

[Sidney Samson]

Нека почива во мир...

 

[JOE]

R.I.P. AJRI

 

[Кралот Марко]

Ајри Демировски

Ти благодариме Ајри!

 

[Another Random Dude]

Требаше да умре човеков за да се дознае за него :icon_conf
Почивај во мир :cry:

 

[Crazy in Love]

Нека му е лесна земјата и вечна славата!

 

[Rick Wright]

Требаше да умре човеков за да се дознае за него :icon_conf
Почивај во мир :cry:

некој за него знаеа и пред да умри :wink:.

Нека почива во мир

 

[Picasso`]

Аллах да му дајт мир и да го "однеси" таму каде што заслужил.

Е ова е Битолчанец! А поголема носталгија од Битола, ниедно место во светот не предизвикува.

 

[theMac3donian]

R.I.P. сите Битолчани ја пеат неговата песна.

 

[AtoM-AnT]

Почивај во мир, твоите песни нема никогаш да умрат!

 

[шарко]

Овој човек е олицетворение на единството што владеело во Македонија. Не е христијанин, а сепак е Македонец по култура и срце. Ваквите луѓе треба да ни бидат пример дека мајка Македонија е мајка на сите добри луѓе во неа, и не смееме да дозволиме на душманите да не раздвојуваат.

Вечна му слава

Нека почива во мир