Ako sakaat mozeme dres da im dademe od Frenki...
Сопственикот на Челзи, Роман Абрамович, ќе му одобри 100 милиони фунти на Карло Анчелоти за обнова на тимот на крајот од оваа сезона. Рускиот милијардер во само два дена имал две средби со трофејниот стручњак во базата на клубот на кои е разговарано за тоа кои фудбалери би биле идеални засилувања за идната сезона. Сепак, на една од двете средби Абрамович на Анчелоти му кажал дека неговата менаџерска функција е безбедна само ако сезонава ја освои шампионската титула во Премиер-лигата, што ќе биде исклучително тешко ако се знае моменталната форма на Манчестер Јунајтед и Арсенал.
Сепак, Анчелоти подготвен заминал на вториот состанок и како свои најголеми желби ги истакнал Фернандо Торес, Серхио Агуеро, Бастијан Швајнштајгер и нов голман. Неофицијално, биле спомнати и имињата на Франк Рибери, Давид Виља и Марек Хамшик, но прашање е колку Челзи има шанси да се вмеша во борбата за нив. Во исто време ќе биде извршена и "чистка" во актуелниот играчки кадар, како и обнова на стручниот штаб кој идната сезона ќе работи со Анчелоти.
"Карло засега ја има поддршката од Роман, но тоа ќе се смени ако на крајот од сезоната на Стемфорд Бриџ не дојдат трофеи. Како и да е, Абрамович планира да потроши многу пари, нешто што не е видено уште откако менаџер на тимот беше Жозе Мурињо. Овој состав е малку престарен и сигурно му треба освежување", изјавил за Дејли маил неименуван извор близок до Челзи.
Абрамович ја имал довербата во Анчелоти поради тоа што италијанскиот стручњак во последните седум години освои две титули во Лигата на шампионите и уште еднаш играше во финалето, сето тоа со Милан. Поради тоа големо разочарување е сегашната елиминација уште во осминафиналето ако се знае дека во претходните две сезони Челзи еднаш играше во големото финале, а еднаш испадна во полуфиналето.
Познати се дел од фудбалерите кои ќе бидат ослободени од обврските. Уште отсега е јасно дека на Џо Кол ќе му биде дозволено да си замине, а Николас Анелка ќе биде продаден ако не се согласи на продолжување на договорот за една сезона. Деко пред извесно време изјави дека сака да се врати во Бразил, а фудбалерите со мала минутажа како Енрике Хиларио, Пауло Фереира и Жулиано Белети ќе бидат пуштени да си бараат нов клуб. Анчелоти очекува да донесе барем две звучни имиња, но во исто време ќе се обиде да го подмлади тимот со фудбалери чие време допрва доаѓа. Петр Чех речиси сигурно ќе има конкуренција идната сезона за разлика од претходните пет бидејќи ќе биде ангажиран талентиран и перспективен голман како Серхио Аснехо од Атлетико Мадрид.
Што се однесува до стручниот штаб, ќе биде разгледана улогата на сегашните помошници на Анчелоти: Реј Вилкинс, Пол Клемент и Кристоф Лолишон. Дури, планирани се и промени во медицинскиот тим кој во моментов е предводен од докторот Брајан Инглиш. Сето тоа се прави со цел да се спречат долготрајни повреди на главните играчи како што сезонава беше случај со Микаел Есјен, Ешли Кол и Жозе Босингва, фудбалери кои до крајот на сезонава најверојатно нема повторно да се појават на теренот.
