Две лекарки од Србија несебично спасиле повеќе давеници од бродот „Илинден“
Охрид, 8. септември (ИНПРЕС)
Жаклина Спасиќ и Гордана Димитриќ, се двете лекарки кои спасија повеќе давеници при несреќата во која потона бродот Илинден. Во тој момент тие се наоѓале на еден од соседните бродови, а по ужасната глетка веднаш се впуштиле во хуманата мисија.
Помеѓу педесетината туристи, нуркачи и полицајци кои учествуваа во спасувањето на бугарските туристи по бродоломот на „Илинден” на Охридското езеро се зборува и за двете српски лекарки, Жаклина Спасиќ и Гордана Димитриќ, кои од сигурна смрт спасија повеќе давеници. Во моментот на несреќата тие патувале во еден од соседните бродови.
Ретроспектива за овој настан направи и Венко Мустракински, од Охрид, кој во моментот на несреќата бил во ресторанот „Котва“ , а за тонењето на бродот дознал од негов сограѓанин и пријател.
- Се упатив со мојот глисер кон „Елешец“, но за жал, успеав само да помогнам во вадење на мртви тела од езерото, вели за ИНПРЕС Мустракински.
Сеуште се испитуваат причините за несреќата, а екипи на експерти од Македонија, Бугарија и Хрватска деновиве се обидуваат да ги утврдат причините за потонувањето на бродот „Илинден“ и да стават крај на мноштвото контроверзни информации кои ја следат оваа голема трагедија.
Во сенка на барањето на одговорите на организационо-техничките прашања останаа многобројните спасители, од кои дел беа и гости од автокампот „Елешец“ и туристите од бродовите „Александрија” и „Кристина” кои меѓу првите им притекнаа на помош на бродоломниците од „Илинден”.
Гордана Ручевска од Кочани, Ѓорѓи Костовски и Бранислав Кодриќ од Скопје, Александар Мојсовски од Тетово се вистинските херои на охридската трагедија. Рувчевска со својот сопруг и глисерот случајно се затекнале на местото на несреќата и благодарение на нивната присебност од водата за само две минути по несреќата, извадиле тројца бугарски државјани кои биле непливачи.
Ѓорѓи, Бранислав и Александар биле неуморни во извлекувањето на давениците, парализирани од паниката. Тројцата од водата на езерото спасија петнаест бродоломници, воглавно постари лица.
Храбриот Ѓорѓе Костовски, младиот Скопјанец кој студира во Бугарија, на многобројните новинари кои овој викенд беа во Охрид со нескриен восхит зборуваше за една од српските лекарки од бродот „Александрија” која несебично им помагала на давениците.
- Уште сум под впечаток на она што го направи таа докторка од Србија. Со свои очи гледав како буквално ги врати од мртвите седум давеници, раскажува Костовски.
- Немам зборови да го опишам тоа што го направи таа госпоѓа, изјави капетанот на бродот „Александрија” Зоран Гилевски.
Докторката останала во чамецот со давениците кои биле во најтешка состојба. Таа и сите оние кои им помагаа на бугарските туристи се вистинските херои на најголемата трагедија која некогаш се случила во водите на Охридското езеро.
Владата на Република Бугарија планира со посебни медалји да им оддаде почит на цивиното население, здруженијата, и на локалните и државните институции кои учествуваа во спасувањето на бугарските туристи при саботната несреќа во која се удавија 15 луѓе при тонењето на бродот „Илинден“.
За оваа цел, како што дознаваме, соседната држава ќе оствари контакти со Македонија на највисоко ниво. (Крај)
извор:
Инпрес
