ВЕСТ НА ДЕНОТ
Традиционален Илинденски пикник на организацијата „Обединети Македонци“ во Торонто
Торонто, 3 август (МИА) - Најстарата македонска иселеничка организација во Канада „Обединети Македонци" на традиционалниот Илинденски пикник што го приреди вчера по 51-ви пат во Торонто, по повод одбележување на двојниот македонски национален и духовен празник Илинден, повикува на одговорност за зачувување на името на македонската држава и народ.
На пикникот присуствуваа повеќе илјади Македонци од Канада, но и од САД. Паркот каде се одржа пикникот беше богато украсен со 120-тина знамиња на земјите што ја признаа Република Македонија под нејзиното уставно име и со повеќе пароли на англиски и македонски јазик за поддршка на државното раководство на Република Македонија за непромена на името на нашата држава. Илинденскиот пикник на Обединети Македонци започна со емитувањето на химните на Канада и Македонија, а го благослови митрополит Методиј, надлежен архиереј на Северно-американската епархија на МПЦ. За значењето на двата Илиндена 1903 и 1944 беседа одржа претседателот на „Обединети Македонци“, Методија-Мендо Бакаловски, a говореше и генералниот конзул на Република Македонија во Торонто Мартин Треневски.
Поздравната телеграма од претседателот на Република Македонија Ѓорге Иванов пред присутните ја прочита вршителот на должност амбасадор на Република Македонија во Отава Славица Димоска. На присутните им се обратија и неколку локални политичари, меѓу кои и советничката за економски прашања на канадскиот премиер Стивен Харпер од македонско потекло Јасмина Игнески.
Во свечениот дел на манифестацијата беше прочитана и Резолуцијата на организацијата „Обединети Македонци“ во која се повикува на одговорноста на денешните Македонци, вклучувајќи ги и ислениците ширум светот како нераскинлив и составен дел од македонското национално ткиво, пред идните поколенија за неменување на вековно име во, како што се наведува, измислениот спор со Грција чија единствена цел е исчезнување на македонскиот народ со сите негови обележја.
Во документот воедно, повикувајќи се на акти на ООН, и оценувајќи ги како срамни преговорите за името на македонската држава и народот, се апелира до претседателот на државата, до премиерот и до претседателот на Собранието да ги преземат сите мерки за започнување постапка за преиспитување на законитоста на Резолуцијата на Генералното собрание на Светската органзиација од 1993 година со која Република Македонија е примена во членство, пред се во делот за привремената референца и обврската за преговори со друга држава за уставното име.
- Одговорно тврдиме дека во спротивно, сите што размислуваат или ќе дозволат промена на државното име Република Македонија го погазуваат Уставот на државата и засекогаш ќе ги сметаме за велепредавници. Ја охрабруваме Владата паралелно додека бара прием во НАТО и ЕУ, да бара прием во сите други регионални и глобални организации и здруженија (неврзаните), како и двострана билатерална соработка со секоја држава што е спремна на соработка без диктат, се вели во резолуцијата.
Иселениците во документот се обврзуваат и дека, како свој дел од одговорноста, ќе продолжат да лобираат во интерес на Македонија и македонскиот народ во своите средини, за што бараат соработка од владините служи за институционално и усогласено да ја вржат својата должност како „бесплатни амбасадори“ на својот народ и држава.
мт/ва/18:26 
