Бугарскиот премиер разочаран од ЕУ
Станишев ја обвини ЕУ дека ја користи Бугарија како
„плашило“ за идните проширувања
Брисел - Премиерот на Бугарија, Сергеј Станишев, ја обвини Европската унија дека ја користи Бугарија како „плашило“ за да го спречи натамошното ширење кон балканските земји место да и' обезбеди неопходна поддршка да ги реши актуелните проблеми со криминалот и да служи како позитивен пример во регионот. Според него, влијанието на зборовите и на гестовите што доаѓаат од ЕУ во јавноста во земјата се огромни и толку големи што на извесни кругови во Брисел тоа им удрило во глава. „Бугарската јавност очајнички сака да верува дека бриселската бирократија е подобра опција, но многу често зборовите што доаѓаат од различни ЕУ-фактори се мотивирани од различни интереси“, порача Станишев, и тоа писмено, преку книгата што ја подели во ЕП.
Неговата реакција во основа е обид пред изборите да си го измие образот од неуспехот да одговори на барањата на ЕУ, што по се' изгледа ќе го плати со политички пораз, но е и прва исповед на лидер на една земја дека замислата за влегувањето во ЕУ и реалноста од тоа сосема не се совпаѓаат. „Ќе ја споменам многу едноставната желба на Бугарите да живеат како Германци и да примаат германски плати од првиот ден на членството, иако за тоа се потребни многу време и големи напори“, рече Станишев.
Според него, има две главни причини зошто Бугарија се' уште е под мраз од Брисел и зошто одговорност за тоа има и Унијата. Првата е погрешното уверување што владее во ЕУ дека транзицијата и демократизацијата одат заедно и дека се неповратни процеси, а реалноста е дека тоа е начин на живеење кој може да функционира само со постојани напори на сите во општеството. Втората причина, според него, е меѓународното ембарго против дезинтеграцијата на Југославија, кое не решило ниту еден проблем, туку само го поттикнало растот на криминалот во оваа земја и во соседството, именувајќи ги притоа Бугарија, Македонија, Србија и Хрватска.
„Лесно е да барате резултати без да дефинирате какви“, вели Станишев, според кого тоа ги фрустрирало илјадниците административци во Бугарија кои работеле тешко и очекувале барем да им се признаат напорите. Но, признава тој, дури сега Бугарите почнале да сфаќаат што значи бриселското клише „недостиг од административен капацитет“. „Ниту на бугарската влада ниту на бугарските административци не им е дозволено време на толеранција, како што имаа некои стари земји-членки“, се пожали тој, тврдејќи дека во сферата на правдата и на внатрешните работи токму тоа им треба, бидејќи притисоците на краток рок не даваат резултат. Судскиот систем и другите фактори во сферата на спроведувањето на законите се најрезистентни на какви било притисоци однадвор, а бидејќи Брисел нема заеднички јазик кога комуницира со нив, или немало резултат или било обратно, тврди Станишев. Притоа се жали дека додека Бугарија не влегла во ЕУ, Европската комисија само генерално ги констатирала слабостите што сега си дозволува да ги гледа толку ригидно и во детали, па очигледно во земјата не го очекувале тоа и се затечени.
За својот неуспех да покаже резултати, бугарскиот премиер ги обвини индиректно и медиумите и јавноста, посочувајќи дека во почетокот на членството сите се занимавале со тоа дали ЕУ ќе им дозволи да печат ракија, да ги колат свињите за Божик и каде ќе можат да одат да бараат работа, а тешко дека некој кажал збор или отворил дебата за такво „здодевно“ прашање како што се реформата на администрацијата, апсорпцијата на ЕУ-фондовите, имплементацијата на законите. „Многу од овие прашања кои се фундаментални за правилно функционирање на Бугарија, како на пример конфликтот на интересите, се' уште се многу далечни за Бугарите, па и за оние што треба да ги решаваат. Затоа ќе биде потребно да се потроши многу време и напор и да поминат многу скандали за тие да се врежат во јавната свест и практика“, заклучи бугарскиот премиер.
Уверен дека за пет-десет години ЕУ ќе се фали со Бугарија како со уште еден позитивен пример од проширувањето, тој го отфрли како лудост начинот на кој се бара да се реши оваа криза со Унијата со тоа што ќе се донесат ЕУ-советници да го менаџираат и контролираат секој проект и секое трошење на парите. Тоа, според него, покажува дека во земјата не се сфаќа вистинската суштина на ЕУ, што пак ќе значи, исто така, дека Брисел ќе се увери уште повеќе дека Бугарија е нефункционална држава. Брисел, според Станишев, ниту сака ниту може да си дозволи ниту, пак, може да управува со Бугарија и да и' кажува што да прави. „Тоа мораме да го правиме ние самите“, порача тој. „Брисел, покрај тоа што е клуб на солидарност, тоа е и место каде што се бранат националните интереси во жестоки дебати, преку преговори и срамно пазарење, каде што секој компромис е внимателно искалкулиран и секоја слабост е бескрупулозно искористена против вас“, вели Станишев. Тоа е место каде што секоја земја, без оглед на нејзината големина и позиција, мора да има самодоверба и јаснотија на интересите, свои позиции и можни сојузници, а не да чека да биде тапкана по рамо и да и' се кажува што да прави“, порача тој.
Бугарија практично е првата земја што стана членка на ЕУ која има многу повеќе негативно од позитивно искуство и која има блокада на речиси сите фондови од Унијата, а според повеќе оцени од Брисел, нејзините слабости се забележуваат и кај земјите од Западен Балкан кои чекаат, исто така, да станат членки во некоја иднина.
http://www.utrinski.com.mk/?ItemID=E57A999701694146B46C19E3AF1C842A
.
