МАЛЕНКО И НЕГОВАТА ДЕВОЈКА СЕ ВО МАКЕДОНИЈА [25.12.2007]
Александар Маленко и неговата девојка се во Македонија. Сместени во хотелот Метропол на Охридското крајбрежје. Овие ексклузивни фотографии на дневниот весник Вечер се направени денеска.
Сител дознава дека Маленко во охридскиот хотел е сместен веќе неколку дена, но во евиденецијата на гости не стои името на Ирина Абрамович, туку русинката со која е дојден се пријавила како извесна Татјана.
Новинарите на Вечер и на Сител денеска разговараа со него, но тој во краткиот телефонски разговор ниту демантираше ниту пак потврди дека неговата идна сопруга е поранешната жена на милијардерот Роман Абрамович.
Маленко револтиран од тоа што во јавноста се зборува за неговиот приватен живот вели:
- Нема што јас да демантирам или да потврдувам. Вие веќе објавивте. И зошто за вас е битно колку пари има мојата идна сопруга на нејзината сметка. Подобро ви е да прашате зошто Владата не ми дозволи повторно да се венчам - вели Александар Маленко.
Некогашниот македонски пливач очекувал поинаков пристап кон него по неговото враќање од Русија. Вели, наместо да го пречекаат поубаво затоа што конечно некој донел нешто во државата што вреди, тој бил третиран многу лошо.
- Знаете ли јас колку пари имам на мојата сметка. Тоа вие новинарите не го знаете. Знаете ли сега колку јас сум моќен. Не сакав да ја расипам Нова година, но сега да знаете ќе го сторам тоа. Моќен сум и верувајте ќе ја расипам Нова година за Македонија - револтирано изјави Маленко, потенцирајќи дека никогаш во животот немал финансиски проблеми.
