Металуршката криза гриза и во кошарката Финансиската криза во металуршкиот сектор може да го загрози опстанокот на кошаркарскиот шампион на Македонија, кавадаречкиот Фени индустри. Во период кога паѓаат индексите на светски берзи и вртоглаво надолу паѓаат цените на металите, спонзорот на кошаркарите реши да испрати на принуден одмор дел од вработените. Од тие причини, и играчите и кошаркарската јавност стравуваат дека по финансискиот крах на шампионот од пред две години, Струмица, на ред е и актуелниот првак Фени индустри. Компанијата за производство на фероникел е главен спонзор на освојувачот на двојната круна минатата сезона, а изминатиов период се соочува со загуби поради падот на цената на металите и поради зголемувањето на цената на енергентите, особено на електричната енергија. Вработените на металуршкиот комбинат од Кавадарци штрајкуваа пред Владата на Македонија, а следниот удар најверојатно ќе го почувствуваат кошаркарите. - Фени преживува тешки моменти. Ваквата состојба негативно ќе се рефлектира врз нормалното функционирањето на клубот. Исто така, оваа ситуација ќе има влијание и во сите сегменти во кои Фени е инволвиран како спонзор. Во моментов немаме конечни информации што точно ќе се случува со компанијата, а според тоа и со кошаркарскиот клуб. Сите сме во исчекување на позитивно решение за целата ситуација. Во зависност од конечниот исход, ќе знаеме и кои чекори ќе бидат преземени од страна на кошаркарскиот клуб. Во моментов знам дека ниту е размислувано, ниту разговарано за евентуално пронаоѓање нов спонзор - изјави Дивна Пешиќ, портпаролка на КК Фени индустри. Оваа година од Првата лига се откажа Струмица. Причината за откажувањето од домашното првенство на шампионот од пред две години беше заминувањето на главните спонзори. Претставниците на неколку грчки фирми кои финансиски го поддржаа успехот на Струмица ја откажаа соработката, а клубот престана да постои. Сведоци сме на реприза на црното сценарио и кај актуелниот првак Фени индустри.