Пробиена брзината на светлината
Досега тоа требаше да биде единственото брзинско ограничување што е невозможно да не се испочитува.
Сепак, научници тврдат дека успеале да ја демонстрираат можноста за патување со брзина поголема од брзината на светлината.
Тоа е противречно со една од клучните аксиоми на специјалната теорија на релативитет на Ајнштајн – дека ништо, под никакви услови, не може да се движи побрзо од 300,000 километри во секунда, т.е. од брзината на светлината.
Теоретски, патувањето побрзо од светлината го враќа времето назад. Според класичната физика, астронаут што се движи побрзо од светлината, на својата дестинација ќе стигне пред да тргне.
Но двајца германски физичари тврдат дека принудиле светлина да го надмине сопственото брзинско ограничување со помош на чудниот феномен на квантно тунелирање, во кој честички акумулираат енергија за да минат низ навидум неминлива бариера.
Нивните експерименти се фокусирале на патувањето на микробранови фотони (светлосни енергетски честички) низ две призми.
Кога призмите биле одвоени, повеќето фотони се рефлектирале од првата призма на која налетале и биле регистрирани со детектор.
Но имало и такви што „тунелирале“ низ празнината меѓу призмите, исто како призмите сеуште да биле споени.
Иако овие фотони минале поголемо растојание, тие стигнале до детекторот истовремено со рефлектираните фотони. Оттука и заклучокот дека транзитот меѓу двете призми се одвивал со брзина поголема од светлосната.
Др Гунтер Нимѕ од Универзитетот во Кобленѕ изјавил дека „засега тоа е единствениот познат случај на отстапување од специјалната теорија на релативитет.“