КОШАРКА
КФМ го планира Работнички
Македонија и во следната сезона на БИБЛ-лигата ќе биде застапена со две екипи, вицешампионот Фени Индустри кој го потврди учеството, а вториот тим најверојатно ќе биде Работнички. Неизвесноста во врска со иднината на најтрофејниот кошаркарски колектив во Македонија по откажувањето на главниот спонзор „Фершпед“ се уште трае, но Кошаркарската федерација на Македонија (КФМ) се надева дека „железничарите“ ќе најдат начин да настапат во лигата. - Иако Работнички има големи проблеми, се надевам дека ќе успеат да најдат начин и средства да настапуваат во БИБЛ-лигата. Тие се кошаркарски бренд на Македонија и поради тоа немаме намера така лесно да се откажеме од Работнички. Во секој случај Македонија ќе има два претставница во лигата следната сезона - изјави Илија Мерџановски, македонскиот претставник во одборот на БИБЛ-лигата. Минатата година во премиерното издание на лигата Работнички играше во финалето каде што загуби од Рилски спортист со 84-77, а претходно во полуфиналето беше поуспешен од Фени И. Спротивно на Работнички, вториот македонски тим Фени го потврди учеството за следната сезона во БИБЛ-лигата која во премиерното издание броеше десет екипи, додека во следната сезона таа бројка се очекува да изнесува 12 екипи. Сепак, списокот на екипи за следната сезона не е затворен бидејќи со финансиски проблеми се соочуваат и екипите од другите земји. Екипата на Слобода Дита поради откажување на главниот спонзор го откажа учеството, а истото го стори и бугарската Черно Море, а не е најсјајна состојбата и со романските екипи кои, исто така, се соочуваат со откажување на спонзорите. Македонија заедно со бугарската и српската кошаркарска федерација се иницијатори за основање на Балканската лига, натпреварување преку кое би се подигнал квалитетот на кошарката во земјите.