Најголемиот проблем со комунизмот, и затоа што никогаш нема да "успее" е затоа што треба сите да се подеднакво идеолози. Не може комунизам со непотизам, не може комунизам со забушанти, не може комунизам со корупција.
Комунизмот е некомпатибилен со човечката природа, бидејќи дури и кога сите луѓе би имале исти плати, би поседувале исти работи, би живееле во исти услови, секогаш човечките потреби ќе бидат различни и секој човек ќе си има различни приоритети и пред се` различни начини на размислување.
Ваквите разлики помеѓу човечките индивидуи секогаш ќе резултираат со тоа што едни ќе се навикнат на тоа што веќе го имаат и кое што веќе го постигнале, а други ќе сакаат да имаат повеќе и да постигнат повеќе, и ќе работат на тоа да имаат и да постигнат повеќе - некои по легален пат, а некои по нелегален пат.
Тоа е основна карактеристика на човечката индивидуа: личните скромности и амбиции.
Едни ќе се задоволат со јавен превоз, други ќе сакаат да поседуваат сопствен велосипед или мотоцикл, трети ќе сакаат да поседуваат сопствен автомобил.
Едни ќе се задоволат со одмор во Охрид, други ќе се задоволат со одмор во гејлада, трети ќе се задоволат со одмор во некоја трета држава со излез на Средоземно Море или подалеку.
И кога ќе почнат да стануваат се` поочигледни таквите разлики помеѓу тие кои си легнале на брашното и тие кои сакаат повеќе, овие првите или ќе квичат поради завист и незадоволство, или ќе одлучат да го следат примерот на тие вторите со цел да ги достигнат или ако е изводливо и да ги надминат, додека вторите или ќе откријат нова горна граница која ќе ги задоволи нивните потреби, или ќе продолжат да ги прошируваат границите на сопствените амбиции до бескрај или додека не се задоволат со тоа што го имаат и со тоа кое што го постигнале.
Во било кое сценарио, идејата за социо-економска еднаквост ќе остане само идеја бидејќи огромен дел од човечкиот род - можеби не мнозинството, но сепак огромен дел - секогаш ќе тежнеат кон повеќе и кон подобро, а тоа не е компатибилно со комунизмот како идеја според која сите ќе бидат исти и еднакви.
Сите сме исти и еднакви под кожата, сме дошле на овој свет без ништо и ќе си заминеме од овој свет без ништо, единствено ќе вреди тоа што сме го постигнале додека сме гостувале на овој свет, а ќе вреди само за нас додека сме живи и за живите кои се блиски до нас.
