Оваа есен, Земјата привремено ќе добие „втора Месечина“, откако астероид ќе биде заробен од гравитационата сила на нашата планета и ќе орбитира околу неа речиси два месеци, објавува Guardian.
Според неодамнешна студија, астероид со големина на градски автобус ќе биде „фатен“ од гравитационата сила на Земјата и ќе стане „мини Месечина“ од 29 септември до 25 ноември 2024 година, пред да се врати назад во астероидниот појас околу Сонцето.
Земјината гравитациона сила ќе предизвика заробениот астероид да кружи околу нашата планета речиси 60 дена.
Карлос де ла Фуенте Маркос, професор на Универзитетот Комплутенсе во Мадрид и главен автор на студијата, објаснува дека овој астероид припаѓа на астероидниот појас Арџуна, група астероиди кои имаат орбити многу слични на онаа на Земјата.
Астероидот е откриен на 7 август преку системот Asteroid Terrestrial-Impact Last Alert System (ATLAS), финансиран од НАСА. Долг е 10 метри, што е релативно мало во споредба со нашата Месечина, чиј дијаметар изнесува околу 3.474 километри. Иако ќе биде премногу мал за да биде видлив со обични аматерски телескопи, професионалните астрономски телескопи ќе можат да го детектираат.
Истражувачите веруваат дека оваа „мини Месечина“ може повторно да се врати во орбитата на Земјата во 2055 година, а претходно вакви привремени „мини Месечини“ биле забележани во 1981 и 2022 година.
youtube.com
