Експлодира незадоволството од „Бум ТВ“
Четири национални телевизии деновиве ќе престанат да емитуваат сигнал за дигиталната телевизија „Бум ТВ“, најавија нивните менаџери. „Канал 5“, „Сител“, „Телма“ и „Алсат-М“ се револтирани од незаконско кодирање на нивните програми и сметаат дека има судир на интереси меѓу Телеком Словенија и ТВ „А1“.
Словенците, кои се сопственици на „Бум ТВ“ велат дека се изненадени од ваквите реакции.
Менаџерите на приватните национални телевизии велат дека го информирале директорот на дигиталната телевизија Јанез Маровт на заеднички состанок со извршниот директор Дарко Перушевски, поранешен директор на телевизијата „А1“.
На состанокот станало збор за незаконското кодирање на дигиталниот телевизиски сигнал на националните радиодифузери преку „Бум ТВ“, за „големите понуди“ за акционерско учество во сопственоста на „Бум ТВ“ и процентот од претплатата што „Бум ТВ“ им го ветувал на националните телевизии, барајќи поддршка за својот проект. Менаџерите велат дека поддршка за проектот дале и преку бесплатни реклами.
- Ако Телеком Словенија сака да продава дигитална телевизија само со „А1“ во понудата, нека повели. Ние ќе се исклучиме од овој проект, бидејќи не можеме да дозволиме да бидеме злоупотребени на овој начин - вели нашиот соговорник од една од незадоволните телевизии.
Тој вели дека по првичните кавги меѓу „Бум ТВ“ и газдата на „А1“, Велија Рамковски, по кои „А1“ воопшто ја немаше во понудата на „Бум ТВ“, во последните неколку месеци дошло до нагло затоплување на односите меѓу Словенците и Рамковски. Само неколку недели откако Дарко Перушевски станал извршен директор во „Бум ТВ“, „А1“ телевизијата била вклучена во понудата, а сето тоа било проследено со договор меѓу Словенците и Рамковски неговите маркети „Хедис“ да бидат главен дистрибутер на уредите за дигиталниот телевизиски пакет во земјава.
Менаџерите на националните телевизии тврдат дека „Бум ТВ“ без никаков надомест ја продава нивната програма. Велат дека газда Велија ќе заработува стотици илјади евра годишно од продажбата на пакетите на „Бум ТВ“ врз грбот на другите телевизии, а со тие пари „А1“ ќе им конкурира при набавките на програмите за да ја направи својата телевизија погледана.
- Ако Комисијата за конкурентност, Советот за радиодифузија и Телеком Словенија толерираат и овозможуваат таков класичен судир на интереси, ние сепак нема да им ги полниме џебовите на Велија и на Словенците, без никаков надомест, што потоа би го вложиле и во нашата програма. Фали само Велија да ни нареди нашите вработени да ги тераме задолжително да купуваат пакети од „Бум ТВ“ - вели нашиот соговорник.
Виктор Доневски, директор за односи со јавноста во ОНЕ, мобилниот провајдер што е во сопственост на Телеком Словенија и истовремено управува со „Бум ТВ“, вели дека има склучени договори со сите национални телевизии за емитување на нивните програми.
Во Комисијата за конкурентност тврдат дека имаат само првични информации за случајот.
- Ако сакаме да бидеме сериозна институција, би било добро да направиме детаљна анализа. Треба да утврдиме дали имаме надлежност за случајот и дали има повреда на ефективната конкуренција и злоупотреба на положбата - изјави Чедомир Краљевски, претседател на Комисијата за заштита на конкуренцијата.
http://dnevnik.com.mk/?ItemID=40136CAA42546B4A9E00785E3479D8A2
