http://asterfest.mk/mk/
Наградите на 9-тиот АСТЕРФЕСТ!
Наградата ЗЛАТНА ПОТКОВИЦА му се доделува на документарниот филм УТРЕ ЌЕ ЖИВЕЕМЕ ПАК на Корина Гизен од Германија.
Во само неколку случаи филмаџијата станува протагонист. Авторката, трудејќи се да им помогне на луѓето во нејзиниот живот, се губи себеси. Филмот е храбро признание за менталните болести, алкохолизмот и фактите на животот. Авторката се погледнува себеси во огледалото и во својот одраз кај гледачот.
Наградата СРЕБРЕНА ПОТКОВИЦА му се доделува на документарниот филм ЌЕ ТЕ ОДНЕСАМ НА МОРЕ на Манца Филак од Словенија.
Многу луѓе не ги земаат работите здраво за готово. Во овој филм авторите одат на еднодневно патување на море и ни нудат трогателна приказна за еден млад пар со пречки во развојот и за напорот и љубовта потребни за да се исполни еден толку едноставен сон.
Наградата БРОНЗЕНА ПОТКОВИЦА му се доделува на документарниот филм КРАЛСТВОТО на Бартош Крухлик од Полска.
Овој филм е интимен портрет на г-н Еуген, кој и покрај староста раководи со својата фирма со дух и енергија на млада личност. Приказната е секојдневна но раскажана со искреност и чесност.
Специјално признание за документарен филм жирито му доделува на авторот Желимир Гвардиол од Србија за филмот СОМНЕЖИ И ТАЈНИ.
Со доза на хумор и критицизам, овој филм се движи по кревката граница меѓу вистината и лагата. Режисерот создава дијалог меѓу ликовите и ја остава одлуката на гледачот.
Наградата за најдобар краток игран филм му се доделува на ШУМАРОТ на Изер Алиу од Македонија.
Приказна од вистинскиот живот и мирисот на земјата по дожд, овој филм разговара директно со срцето. Се работи за патување на зрелоста, за протагонистот во приказната и за режисерот на филмот – едно одлично изведено деби за автор со светла иднина.
Наградата СТАРОЗЛАТЕН ПРОЕКТОР му се доделува на краткиот игран филм УМИРАЊЕ НА СЕНКАТА на Том Ван Авермает од Белгија.
Во овој филм камерата е медијаторот меѓу животот и смртта. Тоа е уникатна приказна за сенките на љубомората, љубовта и жртвата. Со исклучителните визуелни, естетски и актерски изведби, режисерот го води гледачот за рака и заедно нурнуваат во еден неверојатен замислен свет.
Наградата ЃОРЃИ АБАЏИЕВ за најдобро сценарио му се доделува на Бранислав Милатовиќ за филмот СЕ ТОА од Црна гора.
Потребен е голем талент за со малку зборови да кажеш многу. Приказната е минимална, а сепак богата. Во 27 минути зборува за проблемите на едно семејство, татковци и синови, животот и смртта со рамнотежа и грижа.
Специјално признание за игран филм жирито му доделува на авторите Џон Ласт и Џони Хурн од Велика Британија за филмот КРАЛОТ ЏОН, ЧИН IV, СЦЕНА I.
Авторите ни претставуваат една скриена убавина на Шекспировата традиција со одлична современа естетска изведба и кинематичка адаптација.
Наградата за најдобар анимиран филм му се доделува на ТЕЛЕСНА МЕМОРИЈА на Уло Пиков од Естонија.
Филмот е алегорија на колективната меморија. Со трпение и мајсторски изведени анимациски техники, филмот претставува парабола за тоа како нашите тела ја паметат болката и жалоста на нашите претци.
Специјално признание за анимиран филм жирито му доделува на авторот Жарко Иванов од Македонија за КРУЖНО ПАТУВАЊЕ НА СЕНКАТА.
Да одиш на обиколка секогаш значи да се вратиш во иднината – единствено искуство кое може да се почувствува само со уметноста на анимацијата и филмот.
Наградата АЦО АЛЕКСОВ и се доделува на авторката Елизабета Конеска за филмот НАШИТЕ ВО СТАМБОЛ од Македонија.
Со една голема нежност, филмот претставува едно камче од мултикултурниот мозаик во Истанбул. Во овој случај, три генерации Македонци ги споделуваат своите искуства со нас за нивното 100-годишно присуство во градот.
Наградата МУВИЛЕНД за најдобар словачки филм му се доделува на УПАТСТВО ЗА УПОТРЕБА на Јана Минарикова
Поради исклучително атрактивната наративна и визуелна структура, како и поради храбриот и луциден сатиричен тематски третман на човековата порочност. Филм кој бескомпромисно не соочува со животните апсурди и суети.
