Македонија се откажа од потпишувањето договор за добрососедство со Бугарија, вака во бугарската јавност се толкува изјавата на македонскиот миинстер за надворешни работи, Никола Попоски, дека таков договор „не е неопходен“, дадена во Брисел во интервју за Бугарското национално радио.
Од МНР официјално ниту потврдаат, ниту демантираат. Упатуваат на изјавата на Попоски кој на прашање дали треба договор за добрососедство меѓу Софија и Скопје и дали ќе има таков договор воопшто, одговорил:
„Мој личен став е дека не е неопходен, дека всушност добрососедство не се гради на хартија, туку се гради со конкретни гестови и мислам дека помеѓу Бугарија и Македонија има многу добра основа за одлични односи. Впрочем помеѓу луѓето тоа постои и сега. А дали ќе има Договор е прашање на фактот што од бугарска страна беше наметнато тоа како некоја исклучителна потреба. Јас лично мислам дека е подобро да немате Договор отколку да имате Договор кој ќе создава дополнителни проблеми“ – изјавил Попоски, без да прецизира што е проблематично во предложениот текст.
Претседателот на Бугарија Плевнелиев, кој по оставката на владата на Борисов, најчесто се осврнува на надворешната политика, речиси секојдневно во разни прилики повторува дека Македонија не треба да се надева на поддршка на јунскиот самит на ЕУ од кој очекуваме датум за почеток на преговори со Унијата, без почитување на декларацијата од 1999 година и нејзино унапредување во договор за добрососедство.
Ако некој сака да му се помогне, тој мора и да работи. Има две големи прашања, едното е спроведувањето на договорот од 1999 година, особено во изминатите четири, пет години.
Тоа не е голем проблем, може да се реши за секунда. Второто големо прашање е тоа за заедничката историја. Ако некој одлучи дека Гоце Делчев е само нивен херој, а не и наш, наспроти сите одлуки на Европскиот Парламент да ја делиме нашата историја, како што и Германија и Франција ја делат нивната – порача Плевнелиев синоќа од форум во САД.
Клучен дел во меѓудржавниот договор, кој Бугарија го предлага веќе неколку години, би било фокусирањето кон елиминирањето на јазикот на омразата и меѓусебното почитување.
Поранешниот амбасадор во Софија, Абдурахман Алити во телефонски разговор за 24 Вести рече дека Договорот треба да се прифати.
Убеден е дека Бугарија ниту има интерес, ниту желба да ја блокира Македонија на евроатланскиот пат, а единтвениот виновник ако дојде до тоа ќе биде Скопје, смета Алити, додавајќи дека заедничка историја е факт кој треба да се прифати.
И Ѓорѓи Спасов, кој исто така беше амбасадор во Софија, уште есента излезе со став дека Договорот за добрососедство само може да ги унапреди односите меѓу двете земји, потсетувајќи дека Бугарија е првата земја што ја призна независноста на Македонија.
