Иако има една титула помалку од Италија и две од Бразил, во историјата на Светските првенства не постои поуспешна репрезентација од германската. Во Јужна Африка, "Елф" ќе го одбележи својот 17. настап на Мундијалите обидувајќи се да стигне до осмото финале и четвртата титула.
Германија досега не учествувала само на две првенства: првото во 1930 година и четвртото во 1950, двете во Јужна Америка (Уругвај и Бразил). Многу поневеројатно звучи податокот дека од 1954 година кога ја освоила првата титула, Германија на секое Светско првенство учествувала барем во четврт-финалето. Тоа зборува дека се работи за селекција специјално мотивирана за големите натпреварувања без оглед на тоа каде се одржуваат шампионатите и со кој состав настапува. Освен трите титули, Германија досега има уште четири второ и три трети места на првенствата, а бронзата од последниот Мундијал на домашен терен беше окарактеризирана како неуспех.
Од тие причини, фудбалската јавност во оваа земја сега очекува најмалку финале, па и титула со што би продолжил континуитетот почнат во 2006 година. На Мундијалот на домашен терен Германците беа трети, на Европското првенство во Австрија и Швајцарија втори, па златото сега би бил логичен след на настаните. Германија никогаш порано не славела надвор од Европа (како и сите европски репрезентации), па ова е добра можност за прекинување на таа традиција.
Она што кај Германците е најважно е системот кој низ годините се покажал како крајно успешен. Повеќе не е важно кој игра во тимот бидејќи се е подредено на колективот, а репрезентацијата нема имиња како Герд Милер, Франц Бекенбауер, Лотар Матеус или Андреас Бреме. Јасно е дека главен играч е Михаел Балак, но и тој не би бил ништо ако нема добра логистика од другите, и тоа како искусни, фудбалери. Тука се Швајнштајгер, Јансен, Мертесакер, Вестерман, Троховски, Подолски и Клосе, фудбалери кои зад себе веќе имаат две големи натпреварувања со репрезентацијата. Последните двајца имаа очајна сезона во Келн и Баерн (заедно постигнаа вкупно четири гола), но Лев им верува бидејќи на претходните два Мундијали Клосе постигна вкупно десет гола, додека Подолски стигна до шест со тоа што во последните два квалификациски циклуси имаше дури 14 реализации.
Она што може да ги радува љубителите на фудбалот во Германија е фактот што оваа селекција веќе има база за следните големи натпреварувања. Уште на ова првенство шанса ќе добијат десетина фудбалери кои тукушто ја почнуваат третата деценија од животот. Станува збор за Милер (20 години), Хумелс (21), Крос (20), Озил (21), Бадштубер (21), Боатенг (21), Ташчи (23), Марин (21), Кедира 23, Треш (22)... Речиси сите имаа одлична сезона и се очекува да блеснат во Јужна Африка, секако, ако Лев им даде поголема шанса. Ако се знае дека Подолски и Гомез имаат по 24, Швајнштајер 25, а Лам 26 години, јасно е дека на Германија и претстои уште посветла иднина.
Но, зад идиличната слика што ја остава германската селекција, се кријат и доста проблеми. Прво, станува збор за неколку несогласувања во националниот тим кои не им се допаднаа ниту на навивачите, ниту на самите фудбалери. Балак јавно протестираше што во репрезентацијата го нема Торстен Фрингс, а на еден од квалификациските натпревари доби и шлаканица од Подолски. Втора работа е отсуството на Курањи за кого Лев не попушти и покрај големиот притисок од јавноста со образложение дека не му се потребни проблематични фудбалери. Најважно од се, веројатно, ќе биде недостигот на врвен голман што е прв ваков случај за Германија во последните 30 години. Лев многу очекуваше од младите Адлер и Нојер, но првиот се повреди, а вториот низ настапите за Шалке покажа дека е далеку од нивото на Кан и Леман. Во моментов во најдобра форма е Бут, но тешко дека селекторот ќе попушти и ќе му даде шанса пред Нојер и Висе.
Како и да е, Германија е прв фаворит во групата "Д" каде се уште Србија, Гана и Австралија. Пласманот во осминафиналето воопшто не е загрозен, а никој не се сомнева дека Германците долго време ќе останат на југот на Африка. Германија не е во најтесниот круг на фаворитите за титулата, но оваа селекција никогаш не смее да се отпише.
![[ Македоникус ]*](/data/avatars/m/26/26045.jpg?1373015970){kind=avatar}
)