Еднооки заминува во друга телевизија
- Во петок ќе донесеме одлука која телевизија ќе ја одбереме. Веќе имаме повеќе понуди. За сега можам да кажам дека апсолутно ги демантирам тврдењата дека причината што нема да се прикажува на А1 е слабиот рејтинг, изјави екслузивно за ВЕЧЕР продуцентот Борис Дамовски
Популарната емисија Еднооки ќе се емитува на друга телевизија, откако беше донесена одлука дека веќе нема да се прикажува на А1. "Во петок ќе донесеме одлука која телевизија ќе ја одбереме. Веќе имаме повеќе понуди. За сега можам да кажам дека апсолутно ги демантирам тврдењата дека причината што нема да се прикажува на А1 е слабиот рејтинг", изјави ексклузивно за ВЕЧЕР продуцентот Борис Дамовски. Тој објаснува дека следната недела ќе се дознаат појасни ставови околу случајот Еднооки.
Инаку, во Македонија веќе и он-лајн заедницата активираше петиција против најавеното укинување на емисијата. "Оставете ги Еднооки на телевизија, и престанете да го потценувате македонскиот аудиториум!", се вели во петицијата, која започна да ја спроведува он-лајн заедницата на Македонија, против најавеното укинување на популарната емисија Еднооки. "Г-дин Велија и останатите медиумски могули нека го пресметаат бројот на потпишани граѓани на оваа петиција, нека го поделат со бројот на интернет корисници во Република Македонија и нека ги применат методите на анализа на гледаност, па потоа нека даваат "мудри констатации" дека рејтингот на оваа авангардна серија е низок", пишува на интернет страницата
www.petitiononline.com/edno432/petition.html, на која се спроведува он-лајн потпишувањето.
Авторот на петицијата наведува и дека "долупотпишаните веруваат дека серија како што е Еднооки цврсто придонесува кон вистинско градење на демократско општество, а не создавање на квази вредности кои само целат да бидат бледа копија на западно-европските демократски системи".
- Повеќе од секогаш ни е потребен ваков тип на емисија на малите екрани која без пардон ќе врши отстрел на наталожените медиокритетни политичари, нивните изјави, ТВ водители без грам мозок, странски елитисти и т.н., стои на интернет страницата.
Низ Македонија кружат мејлови за Еднооки
-Бидејќи единствениот мотив на газда Велија е "нискиот рејтинг" на Еднооки, формирана е он-лајн петиција во која се бара Еднооки да останат на телевизија, како единствен реален и брутален критичар на жабокречината во која живееме а сакаме да ја нарекуваме македонска демократија. Преку петицијата и бројот на потпишани да им покажеме на луѓето кои вадат реални бројки од пеопле метрите дека Еднооки се гледани и почитувани!", се вели во мејловите кои започнаа да кружат низ Македонија.
