Полициските панцири паднаа од бугарски „Марс“
Полициските панцири произведени во
бугарската фирма „Марс Армор“ стигнале во МВР преку рекламната агенција „Линк медиа плус“
Бугарската компанија „Марс Армор“ ги произвела за „Линк медиа плус“ 500-те панцири за полицајците, за кои маркетинг-агенцијата добила 700.000 евра од МВР. Набавката била спроведена во екот на изборната кампања за локалните и претседателските избори во март годинава. Досега армијата и полицијата панцирите ги набавувала од домашниот производител „Еурокомпозит“ од Прилеп, фирма во државна сопственост.
Покрај оваа „набавка во четири очи“ фирмата „Линк медиа плус“ за околу една година сработила уште три други за МВР - две за маици и еден за ознаки - зделки чија вредност надминува еден милион евра.
„Дневник“ завчера објави детали од непосредната спогодба на МВР со фирмата „Линк медиа плус“ според која фирмата требало да „произведе“ и да испорача 500 балистички елеци и 1.000 заштитни плочи за МВР.
Од МВР потврдија дека во март набавиле заштитни елеци, но детали од договорот не откриваат бидејќи тој бил класифицирана информација.
-“Дневник“ ќе може да го добие договорот во оној момент кога ќе биде приложен соодветен безбедносен сертификат, според Законот за класифицираните информации. По целосно спроведената постапка, според процедурите пропишани за набавки од безбедносен карактер, избрана е најповолна понуда во однос на бараниот квалитет - соопштија од МВР.
Од таму нагласуваат дека пристапот до класифицирани информации на лица што не поседуваат овластувања претставува кривично дело за кое, според Кривичниот закон, е предвидена казна затвор до 10 години.
Бугарската фирма за „Дневник“ потврди дека за „Линк медиа плус“ ги работела панцирите за полицајците. Но, не ги открија ниту цената по која ги работеле ниту количината, бидејќи станувало збор за строго доверлива информација.
- Не можам да ви кажам цена, таа може да варира. Еден панцир може да чини 4.000 друг 1.000 евра, се' зависи од квалитетот. Никој не смее да ви открие цена за таква набавка. Панцирите за вашата полиција се целосно изработени кај нас. Испитани се во наша балистичка лабораторија. Тестирани се и од МВР. Имаат гаранција пет години и се според сите стандарди за квалитет. Една количина беше испорачана пред избори, а другата во мај - изјави Пламен Ташков, управител на „Марс Армор“.
Тој информираше дека фирмата, специјализирана за изработка на панцири, има 50 вработени и соработувала со бугарските министерства за одбрана и полиција, дека извезувале во Египет, Катар и во други земји.
Во домашниот производител „Еурокомпозит“ ни потврдија дека досега редовно соработувале со МВР и со АРМ, но не открија колку би чинела набавката ако би ја работеле тие.
Поранешни високи функционери во МВР тврдат дека панцирите за полицајците ги набавувале по цена од 650 до 850 долари.
Сопственикот на „Линк медиа плус“, Ѓорги Вуков, кој лани од финансиската полиција доби кривична пријава за затајување данок, извршил најмалку десетина набавки за државни или општински институции. Работел два проекта за Град Скопје за дочекот на Новата 2009 година за нешто помалку од 150.000 евра, набавувал униформи за вработените на аеродромите во Скопје и во Охрид за околу 38.000 евра, за 26.000 евра набавил брендиран материјал за Секретаријатот за европски прашања, бил ангажиран за билборди, табли, за хоризонтална и вертикална сигнализација за Гази Баба - за 46.000 евра.
