Демократската Унија за Интеграција, во овој ден на жалост за нашата партија, за Албанското општество и за демократијата во Македонија, во овој ден кога се организира погребот на херојот на демократијата, уште еднаш го афирмира нашиот став дека вчерашниот ден ќе биде симбол за најостро силување на слободниот глас.
Наместо да прогласиме победа, ние денес ја споделуваме болката со семејството кои за помалку од еден час ќе го испратат во вечниот дом Насер Ајвази, кој ќе биде запаметен како херој паднат во заштита на слободниот глас на граѓаните. Ние ја споделуваме жалоста со членовите на семејството, со жителите на Арачиново и Грушино и ја споделуваме жалоста со сите Албанци каде и да се.
Демократската Унија за Интеграција изразува бладодарност до сите активисти и симпатизери на партијата кои останаа доследни и не дозволија да бидат испровоцирани од тешките провокации кои организирано ги вршеа Алфите и милитантите на ДПА. Изразуваме огромна благодарност до сите граѓани Албанци кои не поддржаа со нивниот глас!
Шокантна е „храброста„ и ароганцијата на криминалците и фалангите на ДПА и Алфите кои на многу гласачки места, во присуство на меѓународните претставници, ги полнеа кутиите со фалсификувани гласачки ливчиња, се закануваа, напаѓаа и уценуваа не само членови на изборните комисии, туку особено граѓаните кои беа излегле на гласање. Шокантно е држењето во заложништво на официјални претставници на ДИК и меѓународни набљудувачи во селото Порој, Тетовско, во кое оперирал пратеникот во оставка и кандидат за пратеник на ДПА, Даут Реџепи Лека. Шокантно е присуството на синот на судијата Бедредин Ибрахими, Агон Ибрахими, на гласачкото место 1927 во Тетово, кој, откако им се заканил на овластените претставници на ДУИ и откако ги отстранил од гласачкото место, насилно полнел кутии. Скандалозно е учеството на Министерот за здравство во оставка и носител на листа во ИЕ 1, Имер Селмани, кој заедно со Кондовската банда, уште пред да бидат отворени гласачките места, полнел кутии со фалсификувани гласачки ливчиња. Скандалозно е тоа што Евро Амбасадорот Ерван Фуере бил лично сведок дека во просториите на Градоначалникот на Сарај, Беким Фазлиу, биле депонирани однапред полнетите гласачки кутии. Шокира присуството на кандидатот за пратеник и Потпретседател на ДПА, Ружди Матоши, во населбата Серава во Чаир, каде заедно со бандата на Бушат Хасани, Гафур Хасани и личниот шофер на Матоши, го оркестрирале обидот за убиство на членот на Претседателството на ДУИ, Бекир Хасани, кој се наоѓа во болница. Притворањето на Агим Красниќи со воен арсенал како ја тероризира целата ИЕ 1 не заслужува никаков друг коментар!
За сите овие дејствија бараме институциите на државата да превземат итни мерки бидејќи на 1ви јуни во Македонија потфрли правната држава. ДПА, со криминални и незаконски дејствија се однесуваше во целата ИЕ 1 и ИЕ 6 и во оваа прилика го повикуваме Јавното обвинителство и Јавниот обвинител итно да отвори досие и случај против ДПА и нејзиниот лидер.
Во оваа прилика, уште еднаш повторуваме дека ДУИ ги оспори резултатите во ИЕ 1 и ИЕ 6 каде на организиран начин се крадеа гласови и за сите овие случаи ние имаме подготвено посебно досие со филмски материјал. На сите овие места ќе бараме целосно прегласување.
И покрај невидениот терор кој беше вршен вчера, ДУИ, сепак, излезе победник!
Денес - Алксандар Дамовски Демократијата, Ајвази, Ермира и владините фотелји Падна во борба за демократијата, ја дефинира портпаролката на ДУИ смртта на членот на нивната партија Насер Ајвази,
кој загина демократски пукајќи во полицаец, со демократска намера да го рани или убие.
Приказната е оваа: на денот на изборите, во неделата наутро,
Насер Ајвази свечено зел демократска пушка на рамо и тргнал во борба за демократијата. По некое време му текнало дека патот до демократијата сепак не е толку лесен и дека тешко ќе може да го совлада непријателот само со една пушка, па се вратил дома и, овојпат не на рамо, туку на кола, заденал вистински демократски пушкомитралез. И тргнал на пат за Арачиново. Партиската задача е дека народот мора да се просветлува, да се учи, што знае проста маса како се заокружува гласачкото ливче. Мора демократски да му се покаже како и за кого да гласа, да не случајно потклекне пред својот личен избор.
Нивниот лидер се слика со книга во рака, на неговиот испеглан костум нема траги од рововска кал, но тие, теренските борци за демократија, за правата на народот, знаат како навистина се стигнува до целта. А и секогаш е полесно со пушкомитралез да просветлуваш еден се уште заостанат, нецивилизиран и понекогаш и неписмен народ. Тој не ја разбира книгата, дури и ако се слика со неа.
И нашиот прекален борец за демократијата Ајвази тоа утро наишол на својот непријател, на непријателот на развојот и напредокот - полицијата. Борбата сигурно траела најмалку еден час. Ајвази како и секој борец за демократија до последниот атом од своите сили, имајќи го на ум само правото на народот правилно да гласа, до последниот куршум се борел за таа кауза. Во нерамна и сурова борба на 1 јуни, тој тажен ден за демократијата, Насер Ајвази трагично го загуби животот среде бастионот на демократијата, Арачиново. Загина од куршумите на клетите полицајци, кои и понатаму не можат да погледнат ни чекор подалеку од својот нос и да дофрлат до демократијата, и кои слепо веруваат во недемократското гласање на принципот еден човек, еден глас.
Правилниот избор е тој на Ајвази и на неговата партија, кои се убедени во тоа дека само со силни и јасни препораки и беспоговорни упатства демократијата еден убав светол ден ќе стигне насекаде по Земјината топка. Па и пошироко.
Нов, најсвеж пример на правење будали во македонската историја и соживот. Ова не ни е ни прв, а очигледно ни последен пат (живо се сеќаваме на легендарните мобилни телефони што ги “фрлаа” албанските терористи во 2001-та наместо бомби, на наместениот плач пред сите светски камери и на безброј не толку екстремни примери на правење будали. Такви работи не се забораваат).
Значи класичен криминалец, терорист, бандит, отпадник со илегално оружје пука во полицаец, односно во државата, и тој за партијата со најмногу терористи по пратеничко место е жртва, борец за демократија. Таа партија организира протести на кои му се оддава почит на овој “херој” и јавно раскажува приказни во кои веќе ни самата не верува. Истата таа партија од петни жили се бори да стане дел од власта и да го земе Министерството за транспорт за да може под маса да дели плацеви и дозволи, да дава концесии (како дел од нивната демократија), не се ни обидува да скрие дека пукачот во полицајци е нивен член. Не се ни обидува да го скрие, да го прикрие тој класичен криминален чин, за да не се откријат сите нивни факултативни активности, покрај политичките. Не, тие се храбри, отворени, искрени и беспрекорни. Затоа што, како што еднаш и на јавна сцена кажа нивниот лидер Али Ахмети, тие секогаш имаат и друг излез - шумата.
ДУИ не се ни обиде да објасни како тоа нивен истакнат член на денот на изборите, рано наутро од својот дом наместо со лична карта излегол со пушкомитралез. Никој од нив не се ни обиде да скрие, да каже дека тој не е член, дека не го познаваат и да го осудат излегувањето на гласање со секој цевкаст предмет освен пенкало. Не. Наместо тоа тие по итна постапка го прогласуваат бандитот за демократски херој, избираат организациски одбор што од државата ќе бара пензија за неговото семејство и оформува тим што до неговата родна куќа ќе гради споменик, белег за новите генерации да научат како се стигнува до демократија и да го продолжат патот на нивните татковци.
“Овде почива борец за демократијата. Потпис: Секогаш твои - Али, Фазли, Ермира и Теута.”
Е овие наши пријателчиња многу сакаат да бидат во власта. Беа неколку години со Црвенковски, им се виде убаво. Во планина веќе не се издржуваше. Зима дојде. Фотелјите на власта се удобни, бифето е евтино, а и парно има. Па не џабе гласаа за предвремени избори. Идеологија! Лева десна опција! Принципи! Доследност! Право на избор на мандатарот! Јок! Се е тоа лук и вода во споредба со борецот за демократија Ајвази. Тоа е тоа! Така беше 2001, така и ќе биде, убедени се Ахмети и неговата камарила.
Како што реков, јуни е, лето, планините се тука, дрвјата се раззеленети, нема снег, топло е, зелено е. Зелената боја одмора, а каде најмногу ќе се одмориш ако не таму каде што е најзелено - во планината. А што можеш друго да правиш во планина освен да пукаш. Нивните сивомаслинести униформи најдобро одат со зелената шумска боја. Разлистаните дрвја стануваат одлична камуфлажа. Да не зборуваме за чистиот воздух, макробиотската исхрана и исконската блискост со природата.
Одамна се симнати во град и глумат мир, па најверојатно веќе сериозно ги чеша раката, навикната на топол митралез. Сето тоа е во ред, разбираме. Ама дајте малку подостоинствено до целта, ве молам. Ние пораснавме од мобилните досега. Пораснете и вие.
