Од страна на најголемиот поддржувач САД било сугерирано, Македонија пред 23 јануари, кога ќе се одржи средбата со Северноатлантскиот совет во Брисел, да донесе нацрт закон за употреба на јазиците на малцинствата и договор за социјалниот пакет за припадниците на ОНА.
Според истите извори, земјите членки во моментов размислуваат помеѓу доделувањето покана на Македонија за прием во НАТО и можните последици по регионот, ако тоа не се случи.
Во тој контекст, нерешениот косовски статус е предност за Македонија, која игра конструктивна улога во неговото разрешување, велат дипломатски извори за А1.
НАТО високо го цени и учеството на Македонија во мировните мисии, особено во Авганистан и логистичката поддршка за КФОР на Косово.
„Реформите во одбраната навистина се ценат, тоа е еден од главните адути за нашето доближување до НАТО. Тоа што го дава нашата професионална војска, нашите војници посебно во мировните мисии, е од огромен придонес, спремни се да учествуваме во системот на колективна одбрана“, изјави Лазар Еленовски, министер за одбрана.
Од осумте задачи, кои во ноември ни ги постави помошникот генерален секретар на НАТО Мартин Ердман, останува целосно да се исполнат задачите за здрави меѓуетнички односи и за добри меѓусоседски односи.
НАТО нема забелешки за спроведувањето на реформите, политичкиот дијалог, стабилноста на земјата, борбата против корупцијата и организираниот криминал и функционирањето на институциите.
