Грција купува оружје од моќни европски земји
По набавката на француските авиони „Мираж“, Грција од неодамна почнала разговори за купување оружје и техника од компании од Германија, Шпанија, Италија, земји кои беа меѓу повоздржаните на Самитот во Букурешт, кога се одлучуваше за поканата за Македонија за НАТО.
Планот, според дипломатски извори, е вкупната сума за набавки на Грција оваа година да се зголеми на 8 милијарди евра.
Грчкиот државен врв веднаш по самитот инсистирал на склучување договори со Франција, која беше најголем прогрчки лобист. Набавени се 15 борбени авиони „Мираж“. Тендерите Франција ги добила во битка со американскиот „Боинг“, чија понуда била отфрлена.
Во план е купување и подморници и фрегати. Најголеми фаворити за добивање на тендерот се фирми од Германија, Италија и Шпанија.
Дипломатски извори велат дека ваквото забрзано купување оружје може да се толкува како еден вид благодарност од Атина до земјите кои во Букурешт не покажаа наклонетост кон Македонија. Ова особено било изразено кон Германија како моќна земја членка на НАТО. Се планира од оваа земја наместо од Русија да бидат купени и борбени оклопни возила, тврдат дипломатите.
Инаку, Грција има 10-годишен план за набавка на оружје од 27 милијарди евра од 2006-2015 година. Воениот буџет на оваа земја е 3% од БНП и е еден од највисоките во ЕУ. Поради ова Брисел веќе ја предупреди Грција да го намали воениот буџет.
