ПОП ЅВЕЗДАТА ГО НАЈАВИ КОНЦЕРТОТ ВО МАЈ
Каролина во до сега невидено издание
На скопскиот концерт во салата Борис Трајковски на 13 мај, Каролина ќе се претстави во до сега невидено издание, најавија од "Авалон" продукција на вчерашната прес конференција во Скопје.
" Концертот ќе биде поделен на неколку делови, поп, рок, електронски и етно. Поради шаренилото во мојот досегашен репертоар имам простор за такво нешто. Гости ќе ми бидат Влатко Стефановски и "Беи д фиш". Влатко е гостин во песната "Не се враќаш", а со "Беи д фиш" го снимив дуетот "Идеална жена" (Идеал њоман). Сценскиот и визуелен дел имаме време да го осмислиме уште цели два месеци, рече Каролина.
На пресот беше промовиран и спотот за "Не се враќаш", актуелниот сингл, кој го изработи "Томато продукција", а го режираше Бане Поповиќ. На идеа на Каролина, во видеото играат актерите Весна Станоевски и Игор Стојчевски, а во студискиот дел гостува и Влатко Стефановски. Главната приказна во спотот се врти околу љубовта на двајцата актери кои во повеќето сцени пијат алкохол. На крајот, главниот актер во алкохолизирана состојба гине во сообраќајна незгода. Според менаџерот на Каролина, Бобан Милошески, спотот има позитивна поука за младите.
На 24 март, Каролина во Белград ќе го промовира актуелниот албум "Капка под небото", и се надева дека до крајот на годината ќе одржи концерт во Белград. Веднаш по пресот, поп-ѕвездата замина за Загреб, поради обврските со кампањата за борба против ракот на грлото на матката чије заштитно лице е.