Превземено од
http://kajgana.com/statija_4512.html
Приказната за Славковски
Четврток, 11.12.2008
Јован Ивановски
Не толку одамна, всушност пред само две години, Горан Славковски стана најмладиот играч на Интер кој што некогаш заиграл за овој тим во Сериа А. Кога Славковски дебитираше за Интер, во наптреварот против Сиена кога влезе како замена во 83тата минута, имаше само 17 години и еден месец.
Импресивно, ако се знае дека легендата на Миланскиот клуб Џузепе Бергоми бил постар од Горан, кога за прв пат го облекол црно-синиот дрес. Поради физичките сличности со далекупопознатиот фудбалер Златан Ибрахимович, како и Шведското државјанство и настапите за таа земја во младинските категории, Славковски беше наречен новиот Ибрахимович. Сепак, иднината не беше така розова за ова момче, кое сеуште талка низ европските клубови барајќи шанса за докажување во првиот тим.
Токму тие седум одиграни минути во натпреварот против Сиена, до ден денес се единствените во неговото прволигашко портфолио. Славковски настапи и во еден меч од Купот на Италија, во истата сезона но тоа беше се што видовме од него. Поради блескавата иднина која му беше предвидена, Славковски добиваше повици за настап на репрезентациите на Шведска и Македонија, Македонија земјата од која потекнува неговиот татко. Високиот центарфор после многубројните шпекулации, сепак на крајот заврши во црвено-жолтиот дрес на Македонија, т.е. своето деби за истоимената младинска репрезентација го имаше во Август 2008.
На почетокот на 2008, Интер се договори со Мидлзбро за позајмување на младиот фудбалер до крајот на годината, но трансферот пропадна во последен момент бидејќи Славковски не ги помина медицинските тестови. Следеше понуда од уште еден клуб од Островот, поточно Шефилд Јунајтед која беше прифатена, но и таму Славковски не се снајде баш најдобро. Клубот сметаше дека Македонецот прво треба да се докаже со игрите за резервниот тим, за да заслужи место во стартните XI на првиот тим. Тоа нешто никогаш не се случи, Славковски одигра само 6 натпревари за резервите и постигна 2 гола.
Патешествијата на младиот Славковски не завршуваат тука. Имено, тој во летниот преоден рок потпиша за Хајдук Сплит, но наводно тој трансфер бил извршен нелегално. Поради недоразбирања помеѓу клубовите, 5 годишниот договор кој Горан го имаше потпишано со хрватскиот клуб беше раскинат поради заканите од страна на Интер за тужба поради нелегалниот трансфер. Пред извесно време, се шпекулираше дека Славковски стапил во контакт со клубот во кој ја започна својата фудбалска кариера Малме од Шведска за трансфер, но сепак поради тоа што сеуште бил под договор со Интер не му било дозволено да игра за тимот, туку само да тренира со Малмо.
Веќе станува честа појава, талентираните фудбалери од младинските тимови да не ги исполнат очекувањата на стручњаците. Се повеќе и повеќе се појавуваат нови фудбалери на кои им се лепат етикети, новиот Меси, новиот Роналдињо, новиот Кака. Се споменуваат големи имиња со големо реноме, и секако преголем притисок се врши врз фудбалерите кои наместо да се концентрираат на подобрување на своите фудбалски способности, се преукупирани со други работи од светот на фудбалот.
Кога во 2007 година, светот за прв пат слушна за Славковски, во младинскиот тим на Интер настапуваше еден друг фудбалер кого ретко кој го познаваше. Сигурно веќе погодувате за кого станува збор. Балотели, фудбалерот кој не беше форсиран од медиумите, и фудбалерот кој имаше далеку поголема улога во успехот на Интер минатата година, пробивајќи се во првиот тим и постигнувајќи многу значајни голови. Денес кариерите на овие двајца фудбалери се на сосема различни стани, и ако вчера слушнавме дека за Балотели се интересира Р.Мадрид и другите големи клубови, за Славковски веќе одамна ништо не се пишува. Затоа, фудбалски критичари, следниот пат... замислете се малку повеќе, пред повторно да ставите етикета на некој друг млад тинејџер кој ќе постигне пар голови за младинскиот тим.
