http://www.studying-in-germany.org/
A, другите што се таму или знаат некој од таму и имаат инфо, нека пишат. Реално, зависи од градот. Многу од Македонија студираат во Бамберг (IT).
Јас студирам во Германија на Hochschule Mannheim, смер Automation Technology (Automatisierungstechnik), веќе 3та година ми е.
Во врска со примањето на факултет, нема да имаш проблем, доколку програмата нема "Zulassungsbeschränkung" (т.н. лимит за колку студенти ќе бидат примени по семестар). Мое мислење е дека секој кој ќе аплицира (нормално, ако ги прати сите потребни документи, ако ги исполнува основните критериуми на завршено средно и полагање на TOEFL (за студирање на англиски) и DSH или сл. (за студирање на германски)) ќе биде примен на факултетот. Тоа е така направено, пошто факултетот смета дека после првата година повеќето студенти сами ќе си се одлучат да се откажат и бројот на студенти кои ќе останат драстично ќе се редуцира, што е реално. Кај мене на пример, на почетокот бевме отприлика 60 студенти, до третиот семестар останавме околу 20 -25 максимум. Останатите или се мачеа во претходните семестри или се откажаа. Во случај ако има лимит на бројот на примени студенти, ќе има прелиминарен избор на кој ќе биде примен - за тоа ти треба подобар просек или екстра активности надвор од школо.
Во врска со јазикот, најголемиот број на програми се на германски. Има отприлика 4-5 факултетски програми во цела Германија(бар во времето кога јас барав) кои почнуваат на англиски (и студентот во тоа време интензивно го учи германскиот) и коштаат исто колку германските, т.е. минималната цена од отприлика 140 евра по семестар. Во тие програми веќе во втората година студентот почнува да студира на германски, што за многу е предизвик. Тоа беше случајот кај мене. Јас почнав во првата година на англиски да студирам пошто не знаев ни Guten Morgen на германски да кажам, а знаев Bonjour од друга страна (од мала францускиот го учев). Со англискиот немав проблем пошто во НОВА средно завршив, но сигурна сум дека и студентите од другите средни школи нема да имаат проблем со тоа. Во првата година го учев интензивно германскиот и во втората година почнав да студирам на германски. Не викам дека беше лесно, ама искрено немав време да кажам дека е тешко.
Во третиот семетар моравме да го полагаме DSH и иако само 1 година германски учев добив DSH3. Со тоа сакам да кажам дека не е тешко и за студентите кои немаат учено од претходно германски да студираат во Германија и да го научат паралелно јазикот. Само мотивација. Еве веќе четири семестри се стриктно на германски и можам да кажам дека се помалку и помалку ја чувствувам тешкотијата и напорот да разберам се на часовите.
Во врска со визата, битно е да се запази дека
првиот пат кога се аплицира, мора во Македонија тоа да се направи. Секој нареден пат за продолжување на визата се прави во Германија, не мора да се враќате во Македонија за тоа. Нормално, било Германија, било Македонија, се плаќа за процедурата. Навистина не сум сигурна колку беше, проверете си подобро, ама мислам околу 140 евра. За одобрение на визата ви требаат неколку документи, од кои најважни се потврда од факултетот дека имате место во германија и потврда за околу 8000 евра на
затворена германска сметка, од која што може да вадите отприлика по 700 евра месечно, повеќе не, лимитирано е. Не се залажувајте (како јас на почетокот) дека германците ќе прифатат потврда од македонска сметка, пошто и они се свесни дека секој може да стави и извади 8000 евра од сметката, и само потврдата да им ја покаже. Тоа не пали. Барем не запали кај мене, и неколку други студенти од други земји со кои сум разговарала за истото. Од друга страна, ако имате веќе бугарски пасош - ни пари мора да се покажува, ниту пак да се аплицира за виза, директно на факултетот...
Во врска со колку е скап животот во Германија, ако си пазите, може да поминете и со 500-600 евра месечно. Храната им е многу ефтина (освен ако јадете БИО храна); сместување може да се најде за цена од 200-300 евра плус сметки, или па во студентски дом како во мојот случај е 265 евра за стан кој го делам со 2ца други студенти (машки/женски мешано, не си бирате, освен ако сте од некоја религија каде што не е дозволено мешање). Секоја од нас си има посебна соба со клуч, делиме само кујна, тоалет и бања. Се е платено (струја, вода, интернет) и чистачка ни доаѓа секој втори ден во неделата. Во ова, ноќниот живот ако го вклучите, би рекла 600-700 евра месечно.
Во врска општо со животот, подобро не прашувајте.
Се шалам, тоа се зависи како вие ќе си го организирате. Ако сакате да искачате, ќе најдете луѓе; ако сакате да учите, има читални предобро организирани и за групна работа и за индивидуална. Од друга страна не е како кај нас, „ај на кеј на кафе„ и најмаце 2-3 другари се согласуваат. Тука (барем во Mannheim) луѓето повеќе по дома си се. Кога ќе се стемни, празно е на улиците. Се радувам на сабота кога ќе дојде искрено, за на главната улица во центарот полно со луѓе да е.
Се надевам ви дадов малку општа слика за како се тоа би изгледало кога би дошле тука.
Поздрав,
Елена
