Знаците и изборот на професијата
Овен
Заради својата импулсивна и непостојана природа, вие најчесто спонтано одлучувате со што ќе се занимавате во животот и дали воопшто ќе го продолжите школувањето. Но, едно е сигурно, натпреварувачкиот дух и желбата да бидете третирани како авторитети, речиси секогаш ве тера да изберете некоја динамична и ризична работа во која постојано ќе ја докажувате својата храброст и способност. А, бидејќи не трпите наредби, сигурно ќе се обидете да го завземете лидерското место во професиите што бараат сила и издржливост како што се спортот, војската, правото, политиката, техниката, хирургијата и психијатријата. Сепак, каменот на кој што се сопнувате на патот кон успехот се вашата непостојаност, брзата промена на целите во животот и авантуризмот.
Бик
Бавни по природа, вие уживате во храната и земните задоволства. Додека поседувањето материјални богатства е ваша душевна храна. Затоа, најмили ви се професиите кои со себе не носат многу стресни ситуации, а овозможуваат трајно и сигурно полнење на џебовите. Па, ако не се одлучите за професија поврзана со економијата, комерцијалата, маркетингот и градежништвото, тогаш сигурно среќата ќе ја побарате во големите оперски и музичко-издавачки куќи. Можно е да заблескате како главен мајстор во некој од познатите ресторани. Додека љубовта кон природата и животните честопати од вас прави добар градинар, цвеќар и ветеринар. И можеби вие можете да се пофалите со својата стрпливост и совесност во работењето, но дефинитивно го губите “тлото под нозете” ако некој се обиде да го модернизира вашиот вообичаен начин на работење.
Близнаци
Љубопитни по природа, сакате се да видите, пробате и знаете. Затоа, честопати или не можете да одлучите што би сакале да работите или паралелно работите две или повеќе различни нешта. Сепак, ваши најсилни страни се речитоста, спретноста, духовитоста, моќта за убедување, брзото согледување на ситуацијата, умешноста во комуникацијата со луѓето. Оттаму не чуди фактот што голем процент од новинарите, професорите, адвокатите, писателите, трговците, математичарите, козерите, поштарите, келнерите, дактилографите и шивачите, се родени во вашиот знак. И конечно, ваши најголеми непријатели во градењето на кариерата се површноста, избегнувањето да ги вратите долговите и настојувањето да се провлечете со помалку работа.
Рак
Се што е поврзано со минатото, традицијата, љубовта и семејството е она што вие ќе го работите полека, уредно, со многу љубов и внимание. Па, иако многумина ви замеруваат дека сте претерано опширни во зборувањето, дека сте паничар и дека ги комплицирате работите, тоа не ви пречи да им се посветите на поезијата, историјата, археологијата, етнологијата, старите јазици. Всушност на сето она што влече кон минатото. Но, вие би можеле да бидете исто толку добри и како морепловец, рибар, матичар, па дури и фалсификатор на уметнички дела. А, ако се одлучите да студирате медицина, тогаш сигурно ќе специјализирате гинекологија или педијатрија. И уште нешто. Чувствителни по природа, вие не трпите критика. Па, во таквите моменти ви е полесно да дадете отказ отколку повторно да го погледнете во очи оној што ве искритикувал.
Лав
Вие цврсто, со двете нозе стоите на земја и умеете точно да ја оцените вистинската вредност на нештата. Но дефинитивно, она што најчесто ве донесува до највисоките позиции и до угледот, не е вашето знаење и стручна поткованост, туку подготвеноста “без срам и перде” постојано да се удирате в гради “со тоа кои сте, што сте и кого познавате”. А, кога на тоа ќе се надоврзе и вашата желба да се “покажувате” во јавноста, тогаш е нормално да работите во театрите, на филмот или во професиите поврзани со музиката и вајарството. Но, исто така вие одлично се снаоѓате и во улогата на професор, политичар и нормално на сите раководни места. Додека лекарската професија би ја избирале само поради тоа што најчесто носи висок општествен статус.
Девица
Практични по природа и вредни како мравка, вие сте крајно рационални при изборот на професијата. Па, дури и кога имате некои натпросечни способности или уметнички таленти, вие нема да се насочите во тој правец ако не сте убедени дека тоа материјално ќе ви се исплати. Така, избирате професија што бара прецизност, вредно работење, методичност, без преголемо истакнување пред јавноста, уверени дека за вас би требало да зборуваат вашите дела. Одлично се снаоѓате и во секретарската работа, како сметководител, курир, трговец, новинар, професор, критичар, архивар, како и во професиите поврзани со здравјето и хигиената. И што е најважно, вие сте лојални во работата дури и кога шефовите се неправедни кон вас.
Вага
Со вродено чувство за естетика, достапни за секого но културно дистанцирани, вие се трудите да ја одржите хармонијата во светот околу себе. Па, убедени дека неправдата, кавгите и простотиите ги “вадат од рамнотежа тасовите од вагата на хармонијата”, најчесто избирате професија поврзана со правото, законодавството, дипломатијата, уметноста и културата. А, заради убавиот изглед и грациозните движења, би биле успешни во професиите поврзани со модата, танцот, како ТВ-водител. Но, треба да се знае уште нешто. Заради претераната колебливост, не умеете да пресечете во одлучувачките моменти и лесно трошите пари на она што ќе го привлече вашето естетски изострено око.
Шкорпија
Упорни и бестрашни, кога е во прашање извршувањето на работата со која сте се зафатиле, вие не знаете за компромис. Вашето внимание од секогаш го привлекувало сето она што е таинствено, скриено и неразјаснето. А, можете и да се пофалите дека како ретко кој “не губите глава” во опасните ситуации. Затоа, би можеле да имате одлични резултати во истражувачката работа, хемијата, како и во професиите што со себе носат ризик и опасност. Такви се војската, полицијата, криминалистиката, шпионажата, психијатријата и хирургијата. Ако пак повеќе од се друго го сакате “шушкањето на парите”, сигурно ќе се одлучите за работа во банкарството и трговијата. Но, ако се сметате за продуховени, тогаш сигурно својата професионална среќа ќе ја испробате како мисионер или глумејќи во трагедии. Меѓутоа, вашиот критизерски и провокативен дух најмногу ќе дојде до израз во новинарството и политиката. Сепак, колку и да изгледате сурово, вие коректно ги завршувате професионалните задачи и први отворено ќе му кажете на шефот кога не е во право.
Стрелец
Спортот и престојот во природа за вас се насушна потреба. А, оптимизмот е вашето второ име. Додека потребата од учење и усовршување не ве напушта до крајот на животот. Па, дури ако како ученици не сте блескале во пониските класови, вие сигурно ќе го свртите вниманието кон себе на студиите. Вашиот пак авантуристички дух и желбата за патување ве насочуваат да изберете професија како што е географијата, правото, туризмот, авијацијата. Можно е да се определите и за учење на странските јазици, за трговија со странство. Па со текот на времето, би можеле да запливате и во водите на дипломатијата. Но, ако се сметате за продуховени, тогаш среќата сигурно ќе ја побарате во филозофијата, во проучувањето на религијата или работејќи во хуманитарните организации.
Јарец
По природа сте упорни. А, сите ваши акции се водени од мотивот да ги достигнете највисоките позиции во општеството. Затоа се вооружувате со огромни количини на истрајност и издржливост. Дури сте подготвени и цел живот да учите и да се усовршувате, со цел да бидете подобри од конкуренцијата. Затоа, не е чудно што најголемиот број луѓе кои во една фирма напредуваат од најниските да највисоките позиции, се родени токму во вашиот знак, во знакот Јарец. Покажувате повеќе почит кон недвижниот имот отколку кон “сувите пари” и сакате да учите на туѓите грешки. Сето тоа придонесува за своја професија да ја изберете архитектурата, градежништвото, агрономијата, рударството, историјата на уметноста или трговијата со недвижности. Но, можно е да се пронајдете себеси и во економијата и во психологијата. А, ако сте премногу амбициозни, тогаш сигурно ќе завршите во политиката или дипломатијата.
Водолија
Како деца на ерата што допрва доаѓа, вие со нозете сте на земјата а очите ви се свртени кон небото, ослушнувајќи што е тоа што иднината го носи. Ако на тоа се надоврзе и хуманата жичка на вашиот карактер поради која како и Прометеј сте подготвени да погинете за доброто на луѓето, ете ја причината зошто се обидувате од иднината да им го донесете на луѓето, она што ќе им помогне во сегашноста. Затоа, не е чудно ако работите како пронаоѓач, електричар, авијатичар, техничар во радиото и телевизијата. Најголемиот број атомски физичари, космонаути и оние што работат со компјутерите, се родени токму во вашиот знак. Но, Водолиите неретко се вработуваат и како социјални работници. А, некои од Водолиите остануваат запаметени како големи уметници и пророци.
Риби
На половина пат меѓу сонот и јавето, вас не ве интересира дали живеете во минатото или сегашноста се додека никој не ви го нарушува вашиот вешто искреиран свет. А, во него не се знае каде завршуваат соништата и од каде започнува реалноста. Затоа, бегате од бројките и фактите, во професии каде што е дозволено да се сонува какви што се сликарството, музиката, балетот, поезијата, уметничката фотографија, графиката. Но, можно е да посакате грижата за другите да ја искажете преку изборот на професија поврзана со медицината, социјалната заштита и психологијата. Исто така не е чудно ако за ваша професија го изберете “опиумот за народот” - религијата или ако одлучите да пеете во црковен хор.
???
