Конечно добра вест на темава. Јас иако мислам дека смртна казна е единствено решение, сепак и хемиска кастрација и доживотен затвор за волот ми е прифатливо сега за сега:
Хемиска кастрација и доживотен затвор за педофилите во Македонија
Текст: Макфакс
Македонија | 13 ноември 2013
Зголемување на затворските казни и воведување на мерката медицински-фармаколошки третман за педофилите односно за сторителите на делата полов напад на дете кое не наполнило 14 години, предвидуваат новите мерки против педофилијата, информира министерот за труд и социјална политика, Диме Спасов.
„По спроведената анализа на Министерството за труд и социјална политика и дадените предлози за зголемување на казните и воведување на дополнителен медицинско фармаколошки третман за сторителите на полов напад на деца до 14 години на кои им е изречена казна затвор, истите беа прифатени од Министерството за правда, од правните експерти, професори, судии, јавни обвинители, адвокати, невладини организации, и сите оние кои што работат во делот на заштитата на децата, како и од пошироката јавност!", рече Спасов.
Предлозите се предвидени во измените на Кривичниот законик и вчера биле усвоени на седница на Влада, при што се предвидува заострување на казнената политика, зголемување на затворските казни и воведување на мерката медицински-фармаколошки третман за педофилите односно за сторителите на делата полов напад на дете кое не наполнило 14 години.
„Доколку осудениот се согласи на медицински третман му се намалува затворската казна, а доколку го повтори делото медицинскиот третман е задолжителен", рече Спасов.
До сега кај основниот облик, кој се однесува за сторител кој ќе изврши обљуба или друго полово дејствие врз дете кое не наполнило 14 години казната беше минимум осум години, а сега се зголемува со најмалку 12 години.
Спасов информираше дека за прв пат во Македонија се воведува нова медицинска мерка односно медицинско - фармаколошко лекување (позната во јавноста како хемиска кастрација) на сторители на полов напад врз дете до 14 години на кои им е изречена казна затвор .
Имено, на сторител на кривично дело полов напад врз дете до 14 години кога постои опасност и натаму да врши такви дела судот може да му изрече мерка на медицинско фармаколошко лекување.
Ако за делото е пропишана казна доживотен затвор судот може на сторителот да му изрече казна затвор од 40 години ако тој се согласи на медицинско фармаколошко лекување кое ќе трае до крајот на неговиот живот или до времето до кое според оцената на судот е потребно да трае лекувањето.
Ако за делото е пропишана долготрајна казна затвор од 40 години судот може на сторителот да му изрече казна затвор од 20 години ако тој се согласи на медицинско фармаколошко лекување .
Ако за делото е пропишана казна затвор од 20 години судот може на сторителот да му ја изрече минималната казна затвор пропишана за кривичното дело ако тој се согласи на медицинско фармаколошко лекување кое ќе трае до крајот на неговиот живот или до времето до кое според оцената на судот е потребно да трае лекувањето.
„Мерката медицинско фармаколошко лекување ќе се извршува на слобода во специјализирани медицински установи по издржување на казната затвор, а надзорот на извршувањето на мерката го спроведува Управата за извршување на санкции, која има обврска најмалку еднаш на шест месеци да го известува судот за извршувањето на мерката и за потребата од нејзиното продолжување или прекинување. Ако сторителот не се подложи на мерката медицинско фармаколошко лекување или самоволно го напушти лекувањето судот може да определи мерката присилно да се изврши во здравствена или друга специјализирана установа. Судот и без согласност на строителот задолжително ќе му ја изрече мерката ако сторителот го повторил делото", информираше Спасов.
http://kajgana.com/se-voveduva-hemiska-kastracija-i-dozhivoten-zatvor-za-pedofilite-vo-makedonija
