Христијанин глумел дека е геј и сфатил: Тешко е!
Дваесет и шестгодишниот Американец, Тимоти Курек „излегол од плакарот“ и на своето семејство му признал дека не е геј иако дури година дена глумел дека е со цел да ги преживее искуствата на декларираните хомосексуалци, пишува Huffington Post.
Идејата ја добил пред четири години кога неговата пријателка им признала на родителите дека е лезбејка. Ја отфрлиле, а тој ја тешел.
- Се чувствував како некој да ме удрил. Плачеше на моите раце и наместо да и дадам поддршка, размислував како да ја преобратам, изјави Тимоти. Одлучив да „станам“ геј. На сите им кажав дека сум геј - на семејството, пријателите, познаниците. Морав да разберам како е тоа и започнав социолошки експеримент, вели Тимоти.
Младиот Американец добил работа во геј кафуле, излегувал по геј барови, па дури и се приклучил кон gay softball лигата, иако се идентификува како чист христијанин. Единствени кои знаеле за неговиот потфат биле тетка му, еден близок пријател и уште еден геј пријател кој глумел дека му е дечко.
После објавата, како што тврди Тимоти, 95 отсто од неговите пријатели престанале да разговараат до него, а експериментот најтешко го поднела неговата мајка. Таа во својот дневник напишала дека би била посреќна доколку лекарот и соопштил дека боледува од рак, отколку нејзиниот син да е геј. Сепак со текот на времето ја прифатила определбата на Тимоти.
- Тоа што го доживеав не е ништо во споредба со тоа низ кое минуваат луѓето кои навистина се геј. Тие не можат како мене, после шест или повеќе месеци да станат тоа што биле. Навистина е тешко јавно да се признае дека сте геј, вели Курек.
