Ни солунската болница, ни полицијата, ни попот во селото каде наводно треба да биде погребан Самарџиев немаат потврда на приказната на Стилјан
Александар Самарџиев или Александрос Самарѕис –име за кое никој во Грција не слушнал. Постои ли навистина студентот за кој вчера се тврдеше дека починал во Солун? Болниците во Солун, грчката полиција, жителите на селата во егејскиот дел – никој нема потврда.
Канал 5 контактираше и со Стилијан, тој и понатаму си стои на својата приказна дека неговиот братучед бил претепан од Златна зора, по што им подлегнал на повредите, вели дека бил пренесен во солунска болница. Оттаму пак, вчера ни рекоа дека во периодот додека болницата примала итни случаи, од 8 часот наутро во петокот до 8 часот вчера, немале пациент со конкретните податоци.
На нашето прашање до Стилијан дали случајот е пријавен во полиција, добивме потврден одговор. Од грчката полиција пак, немаат информации. Ниту за во Солун ниту пак за во поширокиот регион на грчката област Македонија. Немаат потврда за случај со момче кое било претепано,и им подлегнало на повредите.
Стилијан тврди дека погребот ќе биде денеска во селото Треболец или на грчки Мавровуни.
Канал 5 се распраша и таму, но никој не чул дека имаат соселанец Самарѕис или Самарџиев. Го контактиравме дури и попот, кој категорично вели, ниту постои дете под тоа име ниту пак денеска има погреб во селото.
Обвинувањата за наводната смрт на 19 годишниот студент одат на сметка на Златна зора. Канал 5 разговараше со пратеникот Никос Илиопулос, кој категорично ни рече дека немаат поврзаност нити пак сакаат да дадат било каков коментар за целиот случај.
Стилијан, од кого започна целата приказна, за Канал5 коментира дека македонските медиуми претерале со инцидентот, без најверојатно да биде свесен дека токму тој е виновникот.
Како што објавивме вчера Самарџиев во петокот на својот фејсбук профил ја објави веста, но оние кои го познаваат велат дека е проблематичен и изолиран случај кој не е поврзан со ниедна организација на Македонците во Грција и има екстремно националистички позиции.
Македонската јавност го запозна Стилјан Самарџиев во август годинава кога наводно бил приведен од грчката полиција поради поставувањето на македонското знаме пред полицијата во Солун. Ниту овој инцидент го немаше во полициските извештаи...