БАЈ ГАЊО (НА)ПРАВИ ПОПИС
...На 6 февруари, недела, на Бугарската национална телевизија беше емитувана чудовишна по времетраење дебата - близу 5 часа, посветена на ... непостоечките Македонци. Немав "задоволство" да ја гледам оваа парада на срамот. Можам само да го прераскажам виденото од мои пријатели. Учествувале одбрани артисти. Трендафил Михов Митев од антимакедонскиот псевдонаучен институт го објаснувал непостоењето на македонската нација, познатиот Бугарин од Р. Македонија Перев раскажувал дека Македонците не постојат и дека Бугарите во Македонија биле прогонувани, Љубчо Георгиевски зборувал за заедничкото потекло на Бугарите и Македонци, Љубка Рондова раскажала дека македонските бегалци биле Бугари, а слично на неа се вклучила и претседателската примадона Чакард’кова да објаснува дека не само што македонските бегалци и другите во Егејот биле Бугари, но и дека оние кои се определуваат себеси како Македонци во Бугарија, се само мал број луѓе. Учествувале и актери од, прочуениот со употребата на расипан македонски јазик, бугарски филм "Мера според мера", кои барем признале дека имале сериозен проблем при разбирањето и учењето македонски за потребите на филмот.
Се работи за националната државна телевизија, зад која стои самата држава. Со пропагандата, која толку активно и во таков исклучителен обем беше направена на официјалната телевизија, државата уште еднаш се ангажира против Македонците и нивното себеопределување.
Забележани беа и голем број нерегуларности за време на самото пребројување. Тие, се разбира, ќе се собираат и анализираат внимателно од соодветните македонски организации, но тука можеме да спомнеме некои случаи за илустрација. Пред почетокот на пописот по домови (започна на 10 февруари) во селото Кавракирово, Петричко, Никола Капс'зов бил посетен од тројца непознати мажи кои не се претставиле, но го советувале со заканувачки тон да внимава со пописот и како ќе се самоопредели.
Во некои села, како на пример во селото Лилјаново, Сандански, градоначалникот одел заедно со попишувачот по куќите, при што изјавувал дека за оние кои не се во домовите, тој ќе даде податоците на попишувачот. Немаме причина да се сомневаме како како ќе се "самоопределуваат" отсутните од страна на државните службеници, и особено како какви нема да бидат запишани.
Во селото Микрево на 10 февруари е констатирана следната тактика од страна на попишувачот Софија Пантева. Иако јасно препорачано во нормативните акти, дека пополнување се врши само со пенкало, таа носела и пенкало, и молив. Освен тоа, кога дошло до прашањата за националност и мајчин јазик само ги прочитала и без да праша како се самоопределуваат луѓето ги подминала и почнала да ги поставува следните прашања. При тоа Костадин Петков Методиев морал да побара да се врати назад и да ги пополни прашањата за националност и мајчин јазик. Ако не постапел така, ќе излезе дека не се изјаснил во однос на ова прашање, бидејќи неговото одговарање не е задолжително. Дали попишувачката го познавала стариот македонски активист и претпоставувала каков би бил неговиот одговор, па затоа се обидела да ги подмине прашањата, или така и било сугерирано да постапува со сите?
На 10 февруари во Благоевград, на ул "Полковник Дрангов", попишувачката категорично му рекла на Јордан Кирилов Палахански дека не може да го запише како Македонец, и откако одбила - спротивно на инструкциите - да го запише човекот така како што самиот се определува , го има запишано така како што таа одлучила - Бугарин.
На 13 февруари во Сандански во домот на Страхил Тупалски попишувачката се обидела да ги пополни формуларите со молив. По неговите приговори таа објаснила дека треба да се пополнува со молив, бидејќи така, ако има грешка, ќе можат да ја поправат. Како што рековме, тоа е во спротивно на посебно истакнатото барање во упатството за попишуачите - да се пополнува САМО со пенкало. Не се сомневам дека меѓу грешките кои би можеле да се поправат на овој начин, не на последно место е и ако некој "згреши" и се запише Македонец. По упорното инсистирање на Страхил Тупалски формуларот бил пополнет со пенкало.
На 17 февруари околу пет попладне две попишувачки го посетиле семејството на Василка Тиханова Цонев на ул "Крајречка" во градот Сандански. Откако го попишале сопругот, кој се изјаснил како Бугарин, преминале на Величка. Таа им рекла првин да запишат Македонка, по што попишувачките и се развикале, зошто Македонка кога не е во брак со Македонец, а сопругот се изјаснува Бугарин? И ја побарале нејзината лична карта. Таа им одговорила дека ќе им ја даде и ќе им одговори на сите прашања, откако ќе ја запишат како Македонка. Тие многу се изнервирале на нејзината изјава, а кога им рекла дека ако не ја запишат Македонка, тогаш можат слободно да си одат, помладата од двете попишувачки се заканила дека ќе дојдат следниот ден со полиција и ќе добие парична казна од 120 лева, бидејќи одбива да се попише.
Ова се само неколку примери, но и тие се доволно за да илустрираат колку далеку од потребните стандарди е извршен пописот и дека повторно се применуваат различни приоди за да се елиминира македонската самоидентификација на пописот. На тој начин со попишувачи во своите домови се попишани 2 / 3 од луѓето. Само 1 / 3 се попиша преку интернет.
Но и тука се поставува прашањето: откако ја имаме оваа толку очигледна позиција и политика на државата против правото за самоопределување на Македонците,
кој ќе ни гарантира дека и резултатите на интернет нема некако да се манипулираат? Навистина, каде е гаранцијата, каде е механизмот против манипулација на резултатите воопшто? Или треба да и веруваме на онаа иста држава која не престанува да тврди дека Македонци нема, и која се потрудила до тој степен да не нема, вклучително и на пописот?
http://www.narodnavolja.com/articles2011/03/txt03.asp
))
ftopic:
