Во меѓународното политичко комуницирање и во меѓународната соработка,во поново време,парламентарната дипломатија станува се поприсутна и позначајна.
Еве како функционира Собранието на Р.М. во тој поглед:
Во пошироките меѓународни парламентарни активности нашето Собрание е вклучено преку Интерпарламентарната унија(ИПУ),самитите на претседатели на парламенти што се одржуваат во рамките и во организација на ОН секои две години во Њујорк а од пред четири години и преку конференциите на спикери на земјите-членки и на земјите-кандидатки за ЕУ кои се одржуваат еднаш годишно.
Ако се знае дека сите меѓународни организации(со мали исклучоци) имаат свој парламентарен дел во кој активно учествуваат парламентарни делегации од националните собранија на земјите-членки на соодветните организации,институции или конференции ќе се добие појасна претстава за функционирањето и за значењето на парламентарната дипломатија.
Во Собранието на Република Македонија има таканаречени пратенички групи за билатерална парламентарна соработка со 42 земји во светот,а целта е да се унапредува парламентарната билатерална соработка преку контакти и посети меѓу парламентарци-членови на такви групи што постојат во речиси сите парламенти во светот.
Собранието избира и парламентарни делегации(вкупно 9) во меѓународните организации што имаат редовни сесии на парламентарните собранија на кои се промовираат и се спроведуваат надворешнополитичките насоки на Република Македонија и се разбира се штитат националниот идентитет и интересите на земјата.
Таквите насоки во Собранието меѓу другото се разгледуваат на редовни седници на Комисијата за надворешна политика како и на Комисијата за европски прашања кои со собраниската Комисија за одбрана и безбедност двапати годишно учествуваат на Европски конференции на споменатите парламентарни комисии.
Тоа сето заедно дава можност дејствувањето на нашето Собрание да има навистина европска политичка димензија.
При усвојувањето и ратификацијата на многубројни спогодби,резолуции и документи што се однесуваат токму на уредувањето на односите со одделни земји или организации,во Собранието може да се поведе широка расправа.Тоа било практика до сега и покажува дека парламентарните дебати го надополнуваат и го заокружуваат спроведувањето на нашата надворешна политика.Практично,отворените и темелни собраниски дискусии се начин на преиспитување на одлуките донесени во доменот и на надворешната политика од извршната власт,а и самото Собрание е неодминлив фактор при донесувањето надворешнополитички одлуки.
Очигледно дека ваквата функција на Собранието е високоразвиена демократска форма што им овозможува јавноста,поточно граѓаните на Република Македонија,да придонесат посредно во оваа значајна сфера на политичкото дејствување.
