Другата страна на приказната за Спаска Митрова
целиот текст
Спаска Митрова и Воислав Савиќ по седумгодишната врска на 15 октомври 2006 година склучиле брак, но тој никогаш не профункционирал, бидејќи веќе наредниот ден невестата решила да ја прекине брачната заедница. Во декември Спаска поднесува барање за развод, а веќе на 11 февруари се раѓа нивното дете Сузана. Бракот официјално е разведен во мај 2007 година. Девојчето и' се доверува на мајката, но и покрај тоа што таа не барала алиментација, по службена должност и тоа прашање било решено во нејзина корист.
Проблемите се појавуваат од моментот кога оваа институција се обидела да го регулира родителското право на другиот родител.
„Спаска Митрова не го сфаќа значењето на институцијата брак и родителството. Целта како институција не ни беше некого да санкционираме, туку да овозможиме нормален третман на двата родитела во остварувањето на родителските права, бидејќи грижата за детето е првенствена“, вели директорката на гевгелискиот Центар за социјални работи, Блага Челева.
Во утврдувањето на хронологијата на целиот овој случај ни помага и правничката Стана Петрова, која во детали и со конкретни датуми се навраќа на сето она што претходело. Раскажува како биле правени бројни обиди да се овозможи таткото непречено да го гледа детето.
Најпрво, мајката се согласила тоа да биде еднаш неделно во нејзиниот дом во кој живее со родителите, но откако било оневозможено тоа, било договорено тоа да биде во Центарот за социјални работи. Кусо време Митрова дозволила детето да го зема таткото Воислав, кога бил правен записник во каква состојба детето се зема и се враќа.
Но, откако станало јасно дека донесените решенија од Центарот мајката не ги почитува, таткото повел кривична постапка, која во двата случаја завршува со условна казна затвор во траење од шест, односно осум месеци. И натаму предметните решенија не се спроведувале, поради што Савиќ преку своите адвокати поведува нова кривична постапка согласно со член 198 од Кривичниот законик, во која со правосилна судска пресуда и' е изречена
безусловна казна затвор од три месеци со задолжително упатување на издржување на казната од 15 јули оваа година.
