Првин убаво информирај се, па потоа носи заклучоци.
Читај сега:
Поради хомосексуалците урната црквичка
МОСКВА - Руската православна црква одлучи да го расчини свештеникот кој на 1 септември годинава во Нижни Новгород венча двајца хомосексуалци. Покрај тоа, до темел е урната и црквичката (капелата) во која беше извршено црковното венчавање. Свештеникот Владимир Енерт ја венча ?вљубената двојка" за 15 илјади рубли, а целата процедура ја снимала една локална новинарка по што избил голем скандал не само во епархијата во Нижни Новогород туку и во цела Русија.
На старешината од една од црквите во Нижни Новгород, Михаил Кабанов, на почетокот од септември му пришле двајца млади луѓе, девојка и момче и го замолиле да им ги даде клучевите од блиската капела (црквичка) за да го изведат црковниот брачен обред, бидејќи наводно тоа не им било дозволено од страна на градските власти. Свештеникот, најверојатно, се сожалил и им ги дал клучевите. Меѓутоа, во капелата се појавило уште едно момче и попот Владимир Енерт. Тој поп и го извршил венчавањето на двојката хомосексуалци, а девојката била новинарка во еден локален весник.
Кога се појави текстот со фотографиите, во Руската православна црква изби голем скандал. Раководството на православната црква го избрка од своите редови попот Владимир Енерт, кој ги венча хомосексуалците, додека старешината на црквата кој им ги дал клучевите нема повеќе да врши божја служба. Еден од гласноговорниците на Руската православна црква, протојерејот Всеволод Чаплин објасни дека поповите ги нарушиле правилата на црковниот живот, па затоа е расчинет Владимир Енерт.
Црквичката во која се венчаа хомосексуалците деновиве е урната до темел, а формалниот изговор е дека во нејзина близина се гради голема црква. Претставниците на црквата велат дека таа била изградена само за привремено користење и се наоѓала на место каде што требало да има голем храм, па тоа е и причината заради која е урната. Сепак, многумина сметаат дека црквата избрзала да ја отстрани капелата за да може што поскоро да се заборави непријатниот настан, т.е. скандалот за кој многу се пишуваше и говореше.
Расчинетиот поп Владимир, наводно, е во депресија и не сака да комуницира со новинарите. Хомосексуалците Денис Гогољев и Михаил Морозов немаа грижа на совеста заради тоа што попот останал без работа, бидејќи велат требал да размисли кога ги зел 15-те илјади рубли. Тој, најверојатно, поверувал дека никој нема да дознае. Сега хомосексуалците на попот му ветуваат работа ако нема од што да живее.
Хомосексуалците кои не ги кријат своите сексуални определувања тврдат дека во Русија, како и во другите земји, се застапени со околу десет отсто. Ако тој податок приближно е точен, тогаш е сосема јасно зошто оние политичари кои однапред се имаат стекнато со таков глас пред изборите одат во геј-клубовите и пријатно си поприкажуваат со своите истомисленици.