Таквите парови јас мислам дека се ретки, кога би ги тргнале на страна машките и женски спонзоруши.
За да запознаеш некој што не е твоја класа, треба да се движите на исти места, а тоа е скоро невозможно. Тие што се богати и можат да си дозволат да трошат нечија цела месечка плата во една недела само на пијачки, сигурно не излегуваат на исти места со тие кои неделно си дозволуваат 2-3 кафиња. Покрај тоа, и да се разминат по улица или на друго место, не верувам дека би се запознале. Луѓето и по надворешен изглед се препознаваат и се делат.
Е сега, доколку испадне некои двајца покрај овие сериозни поделби да се пронајдат и да започнат барем разговор, не би требало тој од помалата класа да се повлече. Ако е прифатен од другиот, би требало да е охрабрен и да продолжи да гради било што повеќе помеѓу нив.
Јас сум имала партнери кои биле со подлабоки џебови од мене, но не сум дозволила тоа да ми е пречка да сум со нив или па да бидам во некој момент понижена од нивна страна. Кога се работи за излегување си одам каде што сама можам да си дозволам и ако испаднело да ни се совпаднат идеите - добро, а ако не - никому ништо. На туѓ грб не сум дозволила да живеам, па затоа и не сум гледала на тие ситуации како на нешто страшно и посебно. И тоа со частењата не ми било проблем, затоа што таков гест одбивам и кога немам и кога имам, освен ако се работи за посебна прилика, па морам да дозволам.
Значи, морам да се согласам дека најчесто ваквите врски се проблематични и немаат баш шанси за успех, но само ако се работи за двајца кои немаат храброст да се изборат, да се откажуваат од многу нешта и да дадат се` во името на љубовта.
