Ако сакаат почисти градови прво нека почнат да го решаваат следниот проблем
Скопското ѓубре не го збира во седумнаесет камиони
Фрлени лубеници, домати, краставици и други скапани прехранбени производи од ѓубрето што го собираат комуналните екипи во градот течат од камионите и се расфрлаат по улиците, а на жешкото време од контејнерите се шири неподнослива смрдеа. Покрај тоа, на повеќе локации во Скопје може да се забележи купишта ѓубре, околу кантите за отпад кои не се празнат. Граѓаните реагираат дека во некои делови од градот отпадот од домовите нередовно се собира, некаде среде бел ден или во часовите кога луѓето заминуваат на работа, па камионите го попречуваат нормалното одвивање на сообраќајот на споредните улици. Ваквата слика и не е за изненадување ако се знае дека главниот град, со повеќе од половина милион жители, се чисти од ѓубрето само со 17 камиони.
Расипан камион на „Комунална хигиена“, од кој истекува течен отпад, подолго време им создава проблеми на жителите од населбата Новоселски Пат во општина Ѓорче Петров. Пред нивните куќи, како што велат, се создал вир од десетина метри полн со ѓубре згмечено во пресите на камионот.
- Додека камионот стои за да се испразнат контејнерите, од него истекува смеса од концентрирано ѓубре и остава темен вир кој е потенцијален извор на зараза. Во смесата мораме да газиме секојпат кога треба да го однесеме сметот во контејнер или да си ги паркираме возилата пред куќа – реагира Кристина Колозова, жителка од населбата.
Во Јавното претпријатие велат дека за овој случај не се известени, но се обврзуваат да пратат возило-цистерна кое ќе го исчисти вирот. Сепак, не одговорија дали ќе се замени дефектното возило или и понатаму истиот камион ќе се користи за собирање отпад.
Оттаму потврдуваат дека пет години не набавиле нови возила, а просечната старост на сегашните е 25 години. Поради потребата од повеќе камиони, „Комунална хигиена“ најави дека до крајот на годинава ќе набави 12 нови возила за собирање ѓубре, со капацитет од 16 кубни метри, со кои планира да го подобри возниот парк. Во моментот претпријатието располага со 29 камиони, но во функција се само 17 камиони. Што се однесува до обвинувањата од граѓаните дека се празнат само контејнерите, а не се собира и ѓубрето околу нив, надлежните велат дека не им е обврска да го чистат и шутот.
- Нашите служби немаат обврска да го чистат градежниот отпад околу контејнерите, а го сервисираат само ѓубрето од домовите оставено до нив. Но доколку отпадот надвор од контејнерите е измешан, а кај нас често е така, тогаш вработените не го чистат бидејќи би дошло до расипување на пресите на возилото кое го собира ѓубрето – објаснија во „Комунална хигиена“.
Додека „Комунална хигиена“ си наоѓа оправдување за своите постапки, граѓаните се принудени, и покрај тоа што редовно си ги намируваат комуналните обврски, да живеат опкружени со смрдеа и со купишта ѓубре.
Граѓаните бесни поради распоредот
Скопјани се жалат и за термините кога комуналните екипи доаѓаат за да го соберат ѓубрето. Во населбите каде што камионите поминуваат наутро, жителите велат дека се попречува сообраќајот токму кога метежот е најголем и сите одат на работа.
- Отпадот се собира според оперативен план што го одобрува Градот. Во одредени зони термините се од 7 до 10 часот наутро, а во други по 21 часот. Затоа и апелираме до граѓаните во тоа време да го фрлаат ѓубрето за да биде собрано – велат од „Комунална хигиена“.
, што треба сега на цела сала ‘Борис Трајковски‘ да ја казнат на секое WC по 50 евра.(од прилика 20 вециња има)
