Полуфинале на Куп - мажи
СЕНЗАЦИОНАЛЕН ТРИУМФ НА СВИССЛИОН ПЕЛИСТЕР!
Битолскиот тим во полуфиналето на домашниот Куп го порази Фершпед Работнички со 82-67 и заслужено се пласираше во големото финале
Во текот на сите 40 минути, кошаркарите на Свисслион Пелистер беа подобар противник од фаворитот на овој меч, Фершпед Работнички. Избраниците на Младен Микиќ влегоа далеку помотивирано и поборбено во натпреварот, а по првите десет минути во изедначена игра шпедитерите имаа минимална предност од 18-17.
Колективната игра во нападот и одбраната го красеше составот од Битола, што на најдобар начин се покажа во вторите десет минути кога со прецизните шутеви од линијата за три поени на Ѓорѓи Талевски и Петар Апцев, Свисслион Пелистер замина на одмор со највисоката предност од девет поени (38-29).
Фершпед Работнички притисна во второто полувреме и со серија од 8-0 на 4 минути до крајот на третата четвртина израмни на 46-46, но тоа беше се што можеше денеска да стори против расположениот битолски тим.
Димитар Караџовски и Милан Миљковиќ повторно ја вратија предноста и во последниот период влегоа со шест позитива (56-50). Талевски и Караџовски уфрлија по една тројка во последниот период за двоцифрена предност (62-50), по која се наѕираше сензационалната победа на Свисслион Пелистер. До крајот со мудра игра во нападот за прво финале во Купот во клупската историја.
Александар Хелд беше предводник во победничкиот тим со 19 поени, Ѓорѓе Јовановиќ уфрли 15, а Талевски и Караџовски по 14 коша.
Диме Тасовски со 21 поен беше најефикасен кај Фершпед Работнички.
Фершпед Работнички ја комплетираше елиминацијата на екипите од главниот град, приклучувајќи се на МЗТ Скопје, Вардар, Торус и второлигашот Вардар Осигурување.
„Мислам дека ја казнивме опуштеноста во тимот на Работнички, чии кошаркари можеби мислеа дека лесно ќе не поминат. Верувавме во сопствениот квалитет, напорно работевме и заслужено се пласиравме во финалето“, изјави кошаркарот на Свисслион Пелистер, Димитар Караџовски.
„Пелистер одигра над своите можности, а ние денеска немавме шутерски ден, премногу промашувавме, додека противникот погодуваше. Битолчани го оставија срцето на теренот и заслужено победија“, рече тренерот на Фершпед работнички, Марин Докузовски.
„Одигравме извореден натпревар, момците беа мотивирани, храбро се бореа и иако реално Фершпед работнички има далеку подобар тим, ние се пласиравме во финалето“, истакна тренерот на Свисслион Пелистер, Младен Микиќ.