Тренерот на Интер Жозе Мурињо планира на лето да потроши 100 милиони евра само за засилувања од тимови од Премиер лигата, со цел да го доизгради тимот и од наредната сезона да цели на трофејот во Лигата на шампионите.
Откако Интер отпадна во првата нокаут фаза во ЛШ годинава, Мурињо беше жестоко критикуван од навивачите на тимот, но поголем дел од негодувањата исчезнаа кога Мурињо го истакна списокот на потенцијални летни засилувања од Премиер Лигата: Дидие Дрогба и Џон Оби Микел од Челзи, Немања Видиќ од Манчестер Јунајтед, Чаби Алонсо од Ливерпул, Џермејн Џенас од Тотенхем и Абу Диаби од Арсенал.
Нероазурите го изгубија двомечот со Манчестер Јунајтед во ЛШ, доживувајќи уште една катастрофална сезона на европски план, иако титулата во Сериа А скоро сигурно ќе ја одбранат и оваа година.
„Специјалниот“ изјави дека ќе продолжи да го развива Интер, но дека сака да го направи тоа на комплетно негов начин, а не со мешање од страна како што беше во Челзи. За таа преродба што ја планира на лето, би му биле потребни минимум 100 милиони евра, иако конечната сума за овие засилувања би можела да достигне и 150 милиони евра.
За да обезбеди дел од овие пари, клубот скоро сигурно на лето ќе се ослободи од Давид Суазо кој моментално е на позајмица во Бенфика, Рикардо Кварезма кој е позајмен во Челзи, Амантино Мансини, Марко Матераци, Патрик Виеира, Луис Фиго, Ернан Креспо и Хулио Круз.
