Кризата го изеде туризмот во Охрид
Охрид - Кризата го зема својот црн данок на туризмот во Охрид. Нема пари за реклами, журки, прскалки и водени лудории. Луксуз е да се изнајми лежалка за 100 или 200 денари, па се' почесто тревнатите површини и дивите плажи се полнат со гости, а модерните комплекси во кои се вложени огромни средства, зјаат полупразни.
Во екот на летната сезона, концесионерите и издавачите на станови кршат прсти и се мислат како да ја спасат сезоната од фијаското кое се заканува, додека инспекциски контроли им висат над глава со цел средување на хаосот на охридското и струшкото крајбрежје. Притиснати од слабата посетеност на туристи, скратената сезона, која годинава едвај ќе трае триесетина дена, и големите издатоци за закуп, концесионерите на плажите бараат итна помош од државата, за да се спаси сезоната од целосно пропаѓање.
„Сезоната е утната. Гости доаѓаат само за викенд. Не само што е разочарување за нас туку чувствуваме како да доживеавме фијаско“, вели Илија Џепар, концесионер на плажата „Корали“. Тој додава дека прометот и на плажата „Корали“, но и во неговата дискотека „Арена“ е речиси двојно намален во споредба со минатите години.
Процените на Инспекторатот за туризам при Општина Охрид се дека бројот на ноќевања летово се намалил за 6-7 проценти во споредба со лани. Бројката веројатно ќе биде поголема кога ќе се сумираат состојбите кон крајот на летото. Полупразните плажи и улици во централното градско подрачје, но и издавачите на станови потврдуваат дека сезоната годинава е далеку под очекуваното.
„Полека пропаѓаме. Годинава е најлошо, оти има многу малку туристи. Сите викаат за истите пари на море ќе одат во Бугарија или во Турција. Но, ги нема повеќе ни туристите од Србија, кои беа најбројни изминатите години“, велат келнерите во охридските кафулиња, разочарани од досегашниот тек на туристичката сезона.
Според закупците на плажи, сменета е клиентелата во Охрид и се' помалку пари се трошат за годишниот одмор. Сведок за тоа е глетката покрај најлуксузните комплекси кои се изградија изминативе три години. Голем дел од удобните лежалки и масите со бамбусови столчиња се празни, а се полнат тревнатите површини под дебелите сенки на дрвјата или, пак, песочните плажи на кои може да се постели крпа и чадор од дома.
Концесионерите и жителите на Охрид главен виновник за она што му се случува на Охрид гледаат во Министерството за транспорт и врски кое, според нив, место да им помогне во услови на криза, уште повеќе ги зајакнува контролите и условите за закуп, најавувајќи и зголемување на кириите.
„Сите удриле по концесионерите, а да не беа тие, плажите воопшто немаше да бидат уредени. Откако вложивме пари, дури отпосле им текна да ги категоризираат плажите“, реагираат концесионерите.
„Плаќаме високи закупнини од седум илјади евра годишно, а сезоната е намалена на 30 дена. Останатиот дел од годината плажите се препуштени на милост и немилост“, вели Илија Џепар од плажата „Корали“.
Укажувајќи дека немаат никаква помош од државата, бараат надлежните да им излезат во пресрет поради лошата сезона и да најдат начин за да ги намалат давачките на закупците на плажи.
Незадоволство од сегашното менаџирање на охридското крајбрежје искажува и локалната самоуправа. Велат дека сега рацете им се сосема врзани, но доколку им биде вратено правото да управуваат со крајбрежјето, ветуваат дека многу работи би биле сменети.
„Подобро е локалната самоуправа да управува со крајбрежјето, оти може подобро да ги менаџира плажите. Локалната самоуправа побезболно би ги решила проблемите и поревносно би ги вршела контролите на плажите дадени под концесионерство. Доколку средствата од концесиите би се влевале во касата на локалната самоуправа, најголем дел од парите би ги вложувала за развој на туризмот“, вели Томе Џамтоски од Општина Охрид.
Градот, според него, може да живее од приходите од туризам и од градежното земјиште. „Сега не се влеваат средства во општинската каса, ниту од едното ниту од другото, бидејќи средствата одат кај централната власт“, додава тој.
Но, од Министерството за транспорт и врски тврдат сосема поинаку. „Согласно со Законот за градежно земјиште, 80 отсто од средствата што ги плаќаат закупците за управување со плажите на Охридско Езеро се слеваат во буџетот на Општина Охрид. Потоа, локалната самоуправа менаџира со овие средства согласно со својата програма и потребите“, велат од Министерството, додавајќи дека плажите кои почнаа да се уредуваат последниве две години ја збогатуваат туристичката понуда, а се бележи и задоволство кај посетителите.
Според податоците на Инспекторатот за туризам, до јуни годинава во хотелите се регистрирани 34.362 ноќевања од домашни гости и 44.000 ноќевања на странски туристи. Процените се дека се реализирани речиси 80 илјади ноќевања, најмногу на гости од Бугарија, Србија и од Грција. Сепак, станува збор за транзитни туристи кои во Охрид останувале најчесто една или две ноќи.
„Поради тоа, како една од приоритетните цели ни е да осмислиме како да ги задржиме туристите на подолг престој, но и во текот на целата година“, вели Гоце Симоноски, раководител на Секторот за туризам и локален развој во Општина Охрид.
Концесионерот на плажата „Корали“ Илија Џепар бара државата да им помогне поради лошата сезона
Веќе е крајот на јули, а на охридските плажи многу ретко можат да се слушнат туристи кои зборуваат на српски, бугарски, француски или на холандски јазик. На прст можат да се избројат посетителите од Русија, кои доаѓаат за да ги испробаат своите параглајдерски вештини на Галичица.
Во центарот на градот можат да се забележат и посетители од Полска и од Чешка, кои се на неколкудневни тури низ Македонија. Слабата туристичка посетеност на Охрид, сметаат странците, е резултат на недостиг од туристичка промоција на Македонија.
„Во агенциите во Франција не сме слушнале дека има понуда за посета на Македонија, ниту, пак, може да се сретне некаков промотивен материјал за овдешните убавини“, велат група туристи од Франција, дојдени на гости кај пријател во Струга.
Најбројни на охридските плажи и годинава се домашните туристи, пред се', средношколците и студентите. Стандардно, како и изминатите години, најпосетувани се плажите на Канео, Потпеш, комплексот „Куба либре“ и новоотворениот „Кадмо“, трите плажи на Градиште, Пештани и во Лагадин.
http://www.utrinski.com.mk/?ItemID=51D5C677C0308B4F95585473C8D44B85
Кризата или дрчноста .....кој ќе да е одговорот!