Живна студентското радио, ама не за сите!
Радиото „Студент ФМ“ при универзитетот Кирил и Методиј по двегодишен прекин, повторно започна со работа. Студиото и радио - опремата во вредност од десет илјади евра, заедно со заостанатиот долг од 50 илјади евра, ги покри Министерството за образование и Ректоратот. Експерименталната програма која ќе заживее на старата фреквенција - 92.9, ќе ја работат студенти по новинарство на правниот факултет, а ќе опфаќа теми од студентското секојдневие. Сепак, редакцијата нема да соработува со студентите од приватните факултети и универзитети, туку само со оние кои студираат на државниот.
-Ова е несомнено добра пракса за младите кои студираат новинарство, каде без никаков притисок, ќе им се укаже прилика да го искажат своето мислење, да актуелизираат теми што ги засегаат, а и да бидат наградени со хонорар. Досега подготвивме 15 емисии и очекуваме студентите од државниот универзитет да соработуваат за да заедно ја збогатиме програмата за да се крене гласот на младите, изјави Ивана Михајловска, апсолвент на студиите по новинарство и дел од редакцијата.
Во Студент ФМ покрај дваесетте студенти, ќе работат уредници за утринска, дневна и за ноќна програма, и неколку техничари. Тие го изразуваат своето задоволство што една година го кревале на нозе ова гласило од студентите за студентите и што конечно проектот стартува.
-Програма ќе има од 9 часот наутро, до доцна навечер и тоа ќе бидат теми што ги засегаат студентите – студиски програми, стипендии, забавни и спортски активности, информации за работата на УКИМ, дебатни, образовни и културни емисии и многу музика. Ќе има и вести за студентската политика, како избори на студентски претседатели и тековни работи изјави Даниела Блажевска, главен и одговорен уредник на радиото и асистент на државниот факултет.
Ова не е единственото студентско радио во земјава, но главен проблем за опстанокот на сите нив, претставуваат финансиите. Поради ова експертите стравуваат од политички манипулации и претворање на радијата во владини маркетинг гласила.
- Ситуацијата е иста на целиот Балкан. Медиумите во кои се обраќаат студентите често престануваат со работа заради немање спонзорства. Затоа младите бараат начин да го изразат својот револт и став преку интернетот и новите медиуми. Сепак, возобнувањето на „Студент ФМ“ е за поздрав и се надевам дека ќе допринесе за решавање на горливите студентски конфликти, објаснува Сеад Џигал, комуниколог и експерт за медиуми.
Во 2008 година програмата на „Студент ФМ“ згасна во етерот заради долгови. Оттогаш студентите повеќе пати протестираа со образложение дека им е скратено правото на слобода на говорот.
Мирослава Симоновска
