Прецизна евиденција на тие што заминале во војна, како и на тие што се вратиле, нема ниедна надлежна служба во БиХ, а упатените тврдат дека тие се потполно фанатизирани и дека претставуваат опасност не само за БиХ, туку и за целиот регион.
Како што изјавил за „Глас Српске“ извор близок до службите за проверка на тие што во БиХ ангажираат борци за светските боишта, џихадистите од БиХ во воените зони остануваат најчесто од три до шест месеци.
„Тогаш, или ја преземаат командата или се враќаат во БиХ. Во последниве девет месеци во БиХ во неколку групи се вратиле вкупно 52 борци. Истовремено, во тој период, како нивна замена, на боиштето во Сирија од БиХ отишле околу 70 нови борци“, рекол тој.
Изворот додава дека во моментов во Хаџиќи има пет борци-повратници од Сирија, во Мостар и во Горња Маоча по четворица, во Травник и во Тешња по тројца, во Бугојно и во Ошве по двајца.
Тие сега се потполно фанатизирани и претставуваат голема опасност, не само за БиХ, туку и за регионот. Некои стануваат службени инструктори на Ал каеда. Други преку своите предавања, во кои емотивно се повикуваат на „својата сириска солза“, „сириските насмеани шехиди“, шират верски фанатизам, опишал тој.
