Гихтот е последица од нарушувањето на прометот на пуринските материи во организмот и таложењето на солите на мочната киселина (урати) во глуждовите и во внатрешните органи.
Гихтичниот напад, кој често се повторува, почнува со силни болки во палецот на ногата, коленото или во друг глужд и е проследен со црвенило, отоци и со лесно покачена температура.
Хроничниот гихт се манифестира со појава на гихтични јазли на прстите, лакотот, коленото, очните капаци, ушната школка и на други места. Последици од хроничниот гихт се вкочанетост и деформација на глуждовите и на внатрешните органи. Гихтот често го придружуваат артериосклерозата и шеќерната болест.
Иако постои предиспозиција за појава на гихтот, тој никогаш нема да се појави ако со начинот на исхрана не му дозволиме. Се смета дека гихтот е болест на луѓе што се прејадуваат со месо и јадат од лакомост, а не од потреба.
Големите месојадачи меѓу луѓето, особено оние од крвната група "А", се најчести жртви на оваа болест. Од гихт заболуваат и луѓе со другите крвни групи чиј систем за варење на храната не е во состојба да ги разложи белковините до аминокиселини, туку само до меѓупроизводот - мочна киселина - што претставува токсичен отпад.
Солите на мочната киселина - уратите - се таложат во глуждовите, понекогаш и во бубрезите и создаваат големи здравствени проблеми.
Многумина од заболените од гихт имаат насобрано големо количество белковини во цревата како резултат од долгогодишно јадење преголеми количества месо во еден или само два оброка во текот на денот, или често внесувале месо во ноќните часови, кога ензимските активности на организмот биле минимални или никакви.
Се разбира дека внесено на ваков начин, месото ниту можело да се разложи до аминокиселини и да се искористи, туку создало високи вредности на мочна киселина во крвта, а со тоа и соли, кои се таложат на разни места во организмот и го предизвикуваат заболувањето гихт со споменатите симптоми и последици.
Не треба да заборавиме дека човекот е дневно суштество. Биолошкиот часовник на човекот е програмиран и навиен според светлината. Ензимските активности на човекот се оптимални само во текот на денот, а во текот на ноќта, предвидена за пасивен одмор, ензимскиот систем се одмора. Тоа значи дека не можеме да очекуваме тој да работи оптимално ноќе и оптимално да ја вари тешко сварливата храна - месото - кога нам ќе ни падне на памет. Лакомите (стрвните) луѓе плаќаат висока цена за јадењето, за својата лекомисленост и неинформираност - ако внесуваат тешко сварлива храна еднаш дневно во преобилен оброк или во ноќните часови постапно, но сигурно ќе си го намалат квалитетот на живеењето и ќе го изгубат здравјето. Болните од гихт најчесто имаат зголемена телесна тежина, но некои луѓе што го имаат ова заболување се со нормална или дури тежина под нормалната. Најчесто акутната фаза на гихтот кај тие луѓе се јавува по летните одмори, кога напорната работа привремено е прекината, а телото престанало да лачи адреналин во поголеми дози, што се случува за време на напорна работа.
Последицата на злоупотреба на белковините во исхраната - гихтот - не се санира одеднаш преку ноќ. Санирањето на последицата, за жал, е долготраен процес, и само упорните и луѓето што веруваат во храната како лек можат да ги надминат тегобите.
Медицината на свој начин ја санира во овој случај последицата од неправилна исхрана, а нутриционизмот со променет режим на исхрана пред да се појават симптомите нуди помош што поскоро да ја надминеме болеста.
Во овој случај мораме да му помогнеме на црниот дроб да се прочисти за да може успешно да ја врши улогата на неутрализатор на токсините во крвта. Потоа треба да ја обновиме оштетената цревна флора со помош на пробиотиците бифидус и ацидофилус и да внимаваме прочистувањето на организмот да не го правиме одеднаш - нагло, бидејќи на тој начин можеме да ја влошиме состојбата.
За да ги надминете тегобите со променет начин на исхрана се препорачува:
- Луѓето со крвни групи О, Б и АБ треба веднаш да го редуцираат консумирањето на црвеното месо од топлокрвните животни и да го заменат со риба, пилешко месо и со протеини од соја. Заболените од крвната група А треба да го исклучат од употреба месото, дури и пилешкото и мисиркиното месо и да го заменат само со риба, со соини протеини и со јајце се додека мочната киселина во крвта не биде во дозволени граници.
- Внимавајте на количеството внесена храна со петте оброци во текот на денот. Не консумирајте тешко сварлива храна во текот на ноќта. По потреба во ноќните часови треба да се консумира само овошје.
- Темелно џвакајте ја храната и не јадете набрзина.
- Од исхраната треба да се исклучи прегореното сончогледово масло. Треба да употребувате ладно цедено маслиново масло. Во текот на денот може да се внесува концентрат од есенцијални масни киселини и тоа двапати дневно по десетина капки за време на јадењето.
- Треба да се исклучи консумирање каков било алкохолен напиток, особено жестоките алкохолни напитоци.
- Во текот на денот треба да се пие два до три литра вода. Кафето и чајот не се соодветна замена за водата. Од чаевите го препорачувам зелениот чај. Водата треба да ја пиеме со исцеден лимон без шеќер, заради можноста да го плакнеме организмот од непотребно насобраните токсини, за што поскоро подобрување на здравствената состојба.
- Намалување на телесната тежина
Масти и масла
- При припремање на некое јадење користете најмногу 2 лажици ладно цедено маслиново масло
- Дневно не употребувајте повеќе од две лажици масло или маргарин/путер
- Избегнувајте масни оброци најмногу што можете, а доколку не можете без нив не конзумирајте повеќе од 2 оброка НЕДЕЛНО.
Слатки, колачи...
- Можете да консумирате слатки во умерена количина.Сепак имајте на ум дека многу слатки содржат скриени масти.
Месо, јајца, риба
- Конзумирајте 1-3 оброци неделно риба (100-120 г)со отстранета кожа
- Во потполност исфрлете ги од мени школките, морските плодови, мозок, црн дроб, слезенки...
- Не конзумирајте повеќе од 1-3 јајца неделно
- Пилешкото месо јадете го без кожа, затоа што таа содржи најмногу маснотии
- Избегнувајте месни обработки
Грав
- Консумирејте еден оброк неделно
Млеко и млечни производи
- Секојдневно консумирајте 2-3 порции млеко или млечни производи
Житни култури, житни производи, компири
- Консумирајте најмалку 3 дневни оброци богати со јаглени хидрати, но дајте им предност и на житните култури.
Овошје и зеленчук
- Конзумирајте најмалку 2-3 порции на овошје и 3-4 порции зеленчук дневно - дајте им предност на свежите плодови.
