Еве како вовед малку повеќе за него: роден е на 11 мај 2004 година во Скопје. Од мал почнал да тренира тенис, и како јуниор има настапено на сите 4 грен слем турнири, а најголем успех постигна на јуниорскиот Вимблдон минатата 2022 година, со пласманот во четвртфиналето. Во двојки исто има настапено на сите 4 јуниорски грен слемови, но секаде беше поразен уште во прво коло. Најдобриот резултат на ITF ранкингот му е 17 место, постигнат на 03.01.2022.
Во 2022 започна неговата професионална тениска кариера. Минатата година играше на многу M15 фјучрс турнири, три пати се пласира во финалето на истите и на крај ги освои. Првиот пехар му е од М15 турнир во Монастир, Тунис, во август 2022, каде во финале го победи Босанецот Азис Кијаметовиќ со 2:1 во сетови. Турнирите во Монастир му беа некој вид отскочна даска, зашто настапи на многу од нив. Вториот М15 турнир кој го освои во октомври 2022 беше во Ираклион, Грција, каде во финалето беше подобар од Романецот Себастијан Гима со 2:0 во сетови и изгубени само 2 гема. Последниот освоен турнир во 2022 беше во декември, во Мадрид, Шпанија, исто М15 фјучрс, каде во финале го победи Британецот Марк Вајтхаус со 2:0 во сетови.
Во 2023 играше во финале на уште 3 фјучрс турнири, но сите 3 ги изгуби: најпрво во јануари повторно во Монастир, Тунис, потоа уште еднаш во Монастир, во февруари, и последното изгубено финале беше на појак, М25 фјучрс во Куршумлијска Бања во Србија. Сите овие турнири и многу други на кои играше му донесоа вредни АТП поени со кои цело време напредуваше на АТП листата. Напредокот му овозможи да игра на челенџер турнири, од повисок ранг, но во споредба со успесите на фјучрсите, тука секогаш крахираше уште во квалификации или во прво коло. Имаше вкупно 7 такви челенџер турнири: прво во Сплит, Хрватска (изгуби во прво коло), па Оеирас, Португалија (пораз во квалификации), па Прага, Чешка (прво коло), па првиот наш челенџер турнир во Скопје каде играше со wild card, нормално (пораз во прво коло), потоа во Познан - Полска, Трој - Франција и Јаши - Романија (сите 3 со порази во квалификации). Серијата неуспеси ја прекина на уште еден челенџер турнир во Јаши, Романија, каде ги мина двете квалификациски кола и се пласираше во четвртфинале на турнирот, што му е до сега највисок пласман на турнири од тој ранг.
Но освен неуспесите на челенџер турнирите, Калин во последниот месец и пол освои уште две титули на фјучрси, овојпат двата М25-ки: првиот, домашниот во Скопје каде беше поуспешен од Французинот Саша Гејмар Вајенбург со 2:0 во сетови, и вчера, на 30.07.2023 го освои М25 фјучрсот во Крамсач, Австрија, со победа над Кореецот Герард Ли со 2:0 во сетови.
Моментално (31.07.2023) е на 336 место на АТП листата, со пад од 1 место по минатонеделниот негов највисок пласман на 335 место. Но по освоениот турнир во Крамсач, наредниот понеделник ќе има new career high, и со 176 АТП бодови ќе биде пласиран на 303 место на АТП листата.
Инаку, моментално на АТП листата е во топ 10 тенисери помлади од 20 години во светот. Наредната недела, со пласманот на 303 место, ќе биде деветти најдобар тенисер помлад од 20 години. Но за понатамошен напредок не може да се задоволи само со фјучрс турнири, ќе мора најпрво да покаже позабележителни успеси на челенџер турнирите, а подоцна зошто да не и мастерси и грен слемови.
Во следните две недели е пријавен да игра квалификации на два челенџери: прво во Бања Лука, Босна и Херцеговина, а потоа Козерки Опен во Полска. Стискаме палци за него.
