Зима кај мене се класици. Традиција некоја ми е ко лепче со паре за Василица. Но, решив овој пат да не биде белетристика, но да биде во врска со истата.
Тери е многу начитан и досетлив човек, којшто веројатно и не малку ги налутил традиционалните теоретичари и критичари. Поштувам конструктивна критика базирана на богатство од знаење. Ирското влијание врз англиската книжевност, како огледало на лошите навики и грешките коишто само набљудувач од страна може да ги забележи. Уште еден показател дека всушност најубавата литература е напишана во преломни периоди, во домови на конзервативни и религиозни семејства, гледајќи го низ прозорецот невидливиот чад од разгорениот огин на неизбежната индустријализација.
За секоја книга има посебно поглавје, а критиката за Џејн Ер најмногу ме шокира. Иако ја имам прочитано 3 пати, ликот никогаш не сум го гледала со такви очи. Извонреден набљудувач и стратег, тие нијанси во нејзиното ослободување од стегите воопшто не се спонтани и многу добро знае што прави. Секако, тоа не ја прави помалку доблесна, само поумна.
