Македонија го напушти шампионат во бадминтон поради грчки уцени 17.09.2009
Македонија демонстративно го напушти Балканскиот младински шампионат во бадминтон поради уцени за името од грчките домаќини, јавува Макфакс.
Грција од денеска во Поликастро е домаќин на Балканскиот бадминтон шампионат до 19 години, на кој Македонија беше пријавена со шест натпреварувачи и двајца тренери.
Македонската екипа го напушти првенството, откако пред самиот почеток на натпреварите по групи, на националниот состав од страна на домаќините им беше соопштено дека мора да го покријат името „Македонија“ на дресовите.
Како солуција, грчките домаќини понудиле македонските национални дресови да бидат обележани со кратенката ФИРОМ.
„Натпреварувачката експедиција во консултација со Македонската федерација во бадминтон одлучи да не настапуваат под никакви услови и да го напуштат првенството во Поликастро“, изјави за Макфакс, претседателот на македонската бадминтон федерација Диме Стефановски.
Тој наведе дека македонската страна за инцидентот веднаш ја известила Балканската федерација во бадминтон.
„Нејзиниот претседател Пузант Казабјан ја поздрави нашата одлука и ја прифати како единствено исправна“, изјави Стефановски.
Грчката страна не го прифатила предлогот на Балканската бадминтон федерација, доколку домаќините инсистираат Македонија да настапува без национално обележје на дресовите, тогаш и сите други репрезентации да настапат под истиот услов.
Македонија е примена во Светската бадминтон федерација е примена под името FYR of Macedonia, додека во Европската под името Macedonian Badminton federation.