„Страшни дворски игри во многу тешки моменти за сите нас“ - изјавил вчера градоначалникот Димитриевски во утринската емисија на ТВ Сител, каде на површината исплива целата неспособност на актуелните власти. За жал, овие „игри“ од нивниот СДССМовски „двор“ излегоа надвор, па заедно со нивната неспособност, премногу ги чинат Кумановци... Премногу!!!
„Страшно се лажеше од лица кои што се одговорни и не смеат тоа да го прават во овие моменти, затоа што истите одговараат за здравјето на сите нас!“ - кажал Димитриевски во истата емисија, со што уште повеќе ја засилува претходната теза. А дали поконкретно тие лица се техничкиот премиер Спасовски и министертот за здравство Филипче, останува само да погодуваме... Овие судири на „суети на поединци кои што ги носат одлуките“ (цитат на Димитриевски), без разлика дали се на локално или централно ниво, за жал ги оставија Кумановци на цедило во многу тешки моменти. И додека тие си ги „мереа“ суетите, Кумановци беа затворени во своите домови, паралелно стигматизирани и прогласени за „недисциплинирании“, за што штетите во економијата допрва ќе следат. И да, заради нивната неспособност. Ова нема да биде заборавено!
„Вината овде е во системот, затоа што истиот систем треба да направи правила и ние не можеме во сред епидемија да се обучуваме како тоа се носи заштитна опрема. Тоа го прават само несериозни држави, за жал, тоа на нас ни се случи.“ - еклатантен исказ на Димитриевски за нивната неспособност, со кој ја сруши скапо платената перцепција што ја наметнуваше Заев, онаа за неговото славно „Блескаме!“. Оваа реалност за несериозна држава, односно реалност за власт која крахира и во моментот на „паѓањето“ се грижи единствено за вдомување на своите партиски војници и наградување на своите милионери од СЈО, добива на уште поголема тежина, но и сериозност, затоа што е презентирана токму од градоначалник на СДССМ!
Но, Димитриевски ниту е „херој“, како што сака да се претстави, а уште помалку е реален критичар на власта. Впрочем, тој остана нем на делењето компири на групи на луѓе во штабот на неговата СДССМ во Куманово на почетокот на месецов, иако сметам дека беше свесен колку тоа можеше да заврши штетно по здравјето на Кумановци. Тој е само уплашен човек, фатен во немоќ да се справи со кризата, оставен сам со својата неспособност, кој за личен спас се фаќа и за сламка... И така фаќајќи се за сламка, сакајќи да ја искористи кризава за да одработи за уште еден мандат, случајно или намерно, ја разоткрива целата негова и неспособноста на оваа Влада!