Добра глупава пропаганда.
Британците од што знаат кои се и каде се Албанија, Македонија, Црна Гора, Србија и Турција, ќе гласаат за излез на Велика Британија од ЕУ.
Можеби помнат која држава е Србија, на крајот на краиштата, Германија и Австрија во Србија најдоа виновник за убиството на Франц Фердинанд во Сараево во 1914 година, па така измислија изговор за да ја започнат Првата Светска Војна, во која Британците победија, ама некако како да заборавиле кои им беа сојузници во таа војна, исто како и во Втората Светска Војна.
Ама од друга страна, за Албанија, Црна Гора, Македонија и Турција сигурно не знаат ни на мапата да ги најдат, а уште помалку па да се плашат од сиромашните Македонци кои со нетрпение чекаат Македонија да стане членка на ЕУ за да им го наполнат Лондон со сиромашна и евтина работна сила, која после 5 години ќе има право на британските социјални и здравствени услуги финансирани од британската држава, односно од британските даночни обврзници - граѓаните на Велика Британија.
Бидејќи очекувам референдумот да заврши неуспешно, односно Британците да гласаат ЗА останување на Велика Британија во ЕУ, се обидувам да ја замислам реториката која Најџел Фараж ќе ја употребува кога од ЕУ ќе најават дека на Македонија и` е дојден редот за зачленување. Сега се обидуваат да ја истуркаат Турција со цел да се осигураат дека нема да дојде до помирување помеѓу Турција и нејзиниот до неодамна наводен сојузник Русија, па се мислам кога ќе ни` дојде редот на нас каква реторика ќе употребува Фараж против членството на Македонија во ЕУ.
Против членството на Бугарија и Романија во ЕУ, аргументите на Најџел Фараж беа огромната корупција и сиромаштија, против членството на Турција во ЕУ аргументите му се сиромаштијата и самиот факт дека Турција се граничи со Сирија, Иран и Ирак.
Каква ќе биде реториката на Фараж против членство на Македонија во ЕУ ?
