Тоше и Андријана - остана само болка
Заедно живееја девет месеци во домот на Проески во Злокуќани, а често патуваа и кај неговите родители во Крушево
Скршена од болка, Андријана Будимир едвај стоеше на траорниот погреб на македонската поп-икона. Тоше за неа подготвуваше бурма
Катерина Шекеровска
Тоше Проески и Андријана Будимир, непосредно пред трагичната смрт, разговарале и планирале стапување во брак и оформување семејство. Иако во јавноста никогаш не кажаа отворено дека се во врска и имаат сериозни намери, нивните најблиски сведочат дека двојката во последниве месеци делела ист дом и живеела во ексклузивната куќа на Тоше во населбата Злокуќани во Скопје. Врската се чуваше во најстрога тајност, дури и самите партнери имаа услогласени изјави за јавноста - дека не им се случува љубов и не се во врска.
Но, по последното испраќање на Тоше Проески во неговото вечно живеалиште на Градските гробишта во Крушево, криењето на љубовната романса повеќе нема никаква смисла. Долго, долго ќе одекнува болката од Крушево. Снимките од стравотните лелеци, плачот, неизмерната болка и скршените души на над десет илјади луѓе, кои му кажаа последно збогум на момчето со ангелски глас во неговото родно Крушево, ќе останат во вечно паметење. Плачеа сите, но стравотно силно „убиваше“ лелекот на најблиските на Тоше - мајка му Доминика, татко му Никола, сестрата Дора и идната снаа, поранешната ракометарка Андријана Будимир.
Скршена од тага, без ронка сила и капка крв на своето лице, облеана во солзи кои не запираа откако ја дозна лошата вест, Будимир го испрати својот Тоше. Истиот оној човек кој (првпат) пред три и пол години и' го зеде срцето, а со кого наскоро со бурма на раката требаше да се заколне на вечна љубов. Будимир заедно со него ги закопа и нивните заеднички планови за стапување во брак и основање семејство.
Ненадејната трагедија уништи се'. Тоше планираше да се венчаат во манастирот кој го градеше самиот - „Св. Преображение“ над Крушево. Последниве месеци ги минаа заедно, девет месеци водеа заеднички живот во неговиот дом во Скопје и често патуваа во родното Крушево. Тоше и Будимир со сите сили се обидуваа да ја скријат својата среќа од јавноста, да уживаат во сопствениот мир и да видат што ќе им донесе иднината. Тоше, растргнат на милион страни, беше сигурен само во две работи - дарот од Господа, ангелскиот глас, и љубовта што ја чувствуваше кон Будимир.
„Барем да му родев дете. Ќе бев најсреќна во целиот свет“, потопена во тага Будимир им се доверила на своите пријателки. Тоше сакал семејство, сакал да се израдува на најмилото, да биде во прегратките на својата најголема љубов, да се буди и заспива покрај неа. И родителите на Проески ја сакаа Будимир, таа за нив веќе беше омилена како снаа.
Но, трагедијата прекина се'. Ја прекина нивната љубов. Андријана Будимир не можеше да се оддели од ковчегот со безживотното тело на својот сакан... „Те сакам, те сакам! Зошто? Зошто? Како да те пуштам да одиш под земја?“, непрестајно повторуваше Будимир на последното испраќање на Тоше, скршена од болка и речиси во полусвесна состојба. Заедно со неа, како утеха (ако постои), беа најблиските - мајка и', сестра и' и вујко и', кои пристигнаа од Србија.
Иако никогаш не призна јавно, Андријана се врати во Македонија поради Тоше. Овде почна и овде реши да се збогува со ракометот за да може да му го посвети целото време на својот човек. Се запиша на студии во Скопје, планираше да почне да се занимава со хуманитарна работа... Ја имаше апсолутната поддршка од својот сакан. Тоше дури се обиде и да и' помогне да потпише договор за да почне да игра во поранешниот клуб Кометал Ѓорче Петров. И тој и таа сакаа да се љубат, но далеку од очите на јавноста. Затоа само најблиските знаеја за она што му се случува на Тоше.
Будимир го мина со Тоше и неговиот последен одмор во Израел, беше со него и при последната посета на родителите и домот на Тоше во Крушево. Заедно заминаа и на неговото последно патување - таа се симна порано, попат, остана кај најблиските во Србија, чекајќи да и' се врати нејзиниот љубен од Хрватска.
Тој не се врати. Се врати само ковчегот со неговите останки. Будимир е скршена од болка. Изгуби се'. Најголемата среќа и' се претвори во најголема трагедија. Се' уште не може да верува. Го чека Тоше... Да се прегрнат, бакнат и да го продолжат животот заедно...
„А еден ден... Еден ден кога ќе се освестам, кога ќе се разбудам од најцрниот кошмар, ќе му раскажам на светот, ќе му раскажам каков човек беше Тоше навистина... Зашто јас најдобро го познавав...“, е последното нешто што Будимир им го кажала на своите
извор:
УТРИНСКИ ВЕСНИК
тажно но вистинито
