Осим: Ако СФРЈ беше светски првак, војна можеби ќе немаше
Поранешниот југословенски фудбалски селектор, Босанецот Ивица Осим, изјави дека војната на просторите во поранешна СФРЈ немало ниту да има, ако селекцијата на таа земја ја освоеше титулата во 1990 година, на Светското првенство во Италија. На тој мундијал Југославија заврши на петтото место
- Можеби сум оптимист, меѓутоа се прашувам што ќе се случуваше во Југославија доколку успеавме да се пласираме во полуфиналето или финалето. Можеби немаше да дојде до војна доколку станевме светски прваци. Но кога трезвено ќе размислам, никако не можам да поверувам дека ќе постигневме таков успех - рече Осим, во интервју на Си-ен-ен.
Југославија на Мундијалот во Италија го заврши настапот во четвртфиналето по поразот од Аргентина на пенали. На тој меч Осим многу рано остана без Рефик Шабанаџовиќ поради црвен картон, а токму тој играч го чуваше Марадона. Југославија со играч помалку на теренот беше многу подобра од Аргентинците и пропушти неколку колосални шанси за победа, но на крајот загуби на пенали.
- Играчите тогаш сфатија колку се силни. Шпанија и тогаш, како и денес, беше фудбалска велесила. Мечот со Аргентина можеби беше најдобриот натпревар на Југославија под мое водство - рече Осим.
Тогашниот селектор на СФРЈ откри дека поранешниот македонски селектор Среќко Катанец, кој тогаш беше дел од репрезентацијата не играл поради физички закани кон неговото семејство.
- Катанец беше многу важен играч во нашиот состав. Пред натпреварот тој ме замоли да не го ставам во тимот, зашто неколку часа претходно, на неговото семејство во Љубљана им се заканувале со одмазда доколку би заиграл против Аргентина. Сфаќам во каква ситуација бил. Како можеше да игра во такви услови, затоа и му ја прифатив молбата - рече Осим.