Анализа на репрезентации - ЕП 2016

[BilboBaggins]

WALES
ВЕЛС
CYMRU

The dragons have landed!!!​

Вратите на Европското првенство конечно се отворија за црвените змејови од Британија. После долги 58 години од првиот и засега единствен настап на светските првенства, во кој достоинствено се поклонија пред бразилците и младиот Пеле во 1/4 финалето, Велшаните конечно ќе можат да следат едно големо фудбалско натпреварување со патриотски набој во своите срца. Четата на Крис Колман, командувана од врховниот змеј Герет Бејл, прелета низ сите краишта на Европа во походот кон докажување на својата зрелост и спремност за настап во Франција, притоа претворајќи ги во пепел и прав екипите на Андора, Израел, Кипар и Белгија, единствено потклекнувајќи во Зеница, во битката за змејскиот трон на Европа против плавите Босанци. Како подготовка пред европското, Велс одигра пријателски меч само со Шведска во кој беше поразен со 3-0, а во март ремизираше со Северна Ирска и загуби од Украина

Составот на Велс е целосно составен од островски играчи, со исклучок на Герет Бејл, за кого Британија се покажа како премала, па во 2013та замина на дообука во егзотичната Шпанија, што се покажа како одличен потег - игрите за кралскиот клуб му помогнаа на Бејл да го достигне својот фудбалски врв и да ја превземе командата над својата репрезентација, речиси сам преземајќи одговорност за сите добиени поени низ квалификациите. Освен Герет, ѕвездите се ретки во оваа репрезентација. Најзвучните имиња се Арон Ремзи, Џо Ален и Џо Ледли. Велшкото мото GORAU CHWARAE CYD CHWARAE (тимската игра е најдобра игра) одлично ја опишува оваа генерација на фудбалери, сплотена низ својата синергија и командувана од Бејл. Целосниот список на повикани фудбалери изгледа вака:



Колман преферира да игра со формација 3-5-2 или 3-4-2-1.На голот неприкосновен е Вејн Хенеси кој треба да го понесе целиот товар на својата позиција. Тежината на трите одбранбени столбови ќе ја носат Бен Дејвис, капитенот Ешли Вилијамс и еден од двајцата Џејмсовци - Колинс или Честер. Дуото дефанзивни крила е составено од Крис Гантер и Нил Тајлор, а Џез Ричардс својата шанса ќе ја чека од клупата. Составувањето на средниот ред ќе зависи од нивото на подготвеност на играчите, особено Џо Ледли кој се опоравува од фрактура на ногата, па така доколку сите се здрави и спремни до 11 јуни, Ален и Ледли треба да ја држат средината на теренот, Арон Ремзи да биде поврзувачката алка меѓу овие двајца и Герет Бејл, а местото во шпицот ќе го завземе Робсон-Кану. Доколку фитнес тренерите не успеат да се справат со повредените играчи, тука се Енди Кинг кој ќе го замени Ледли и Сем Воукс кој би стартувал во шпицот. Освен овие двајца, шансите за некој друг играч од клупата да стартува и да влијае во голема мера на велшката игра се минимални.

Исто како и во квалификациите, среќата им се насмевна на змејовите при жрепката за групната фаза, па така ги избегнаа Италијанците и Швајцарците од вториот и Швеѓаните и Полјаците од третиот сад. За разлика од овие репрезентации, Русите и Словаците влеваат огромна надеж дека можат да бидат надиграни.

Велс своето деби на европската сцена ќе го има на 11 јуни во 18:00 часот на стадионот во Бордо против Словачка, со која имаат скор од 1-1 во меѓусебните дуели. Копјата ќе ги вкрстат клупските колеги од Ливерпул, Шкртел и Ален и двајцата лидери Хамшик и Бејл. Прв од двата натпревари за да се биде или не за двете репрезентации, во кој фаворитската улога е во сосема мала мера на страната на Словаците, главно поради искуството на фудбалерите кои беа дел од одличните игри на Светското првенство во Јужна Африка.

15 јуни е денот резервиран за Британското дерби. На стадионот во Ленс, во 15 часот, Велшаните ги чекат трите Англиски лавови, во ремонтиран и подмладен состав. Кејн, Руни и Варди во целата своја моќ ќе удрат на велшкиот змеј, во битка до последен здив. Велшаните во тотално подредена и аутсајдерска улога, ќе атакуваат на бод кој за нив ќе биде голем како планина, но покажат ли лавовите и најмал знак на гордост и опуштање, лукавоста на змејот сигурно ќе изнајде начин за да го зграпчи целиот плен.

Тулуз, 20 јуни, 21 часот. Денот Д за Велс. Доколку излезат со празни раце од двете претходни битки, во оваа ќе мораат од самиот почеток да атакуваат на победа. Руските орли со поткастрени крилја доаѓаат во Франција, откако Џагоев и Денисов се повредија во подготвителниот период, но историјата е на нивна страна - трипати досега го поразиле Велс, еднаш ремизирале и ниту еднаш не доживеале пораз. Олеснувачка историска околност е дека од 2008 наваму, Русите на два пати не успевале да ја пројдат групната фаза, па за очекување е и оваа година да имаат потешкотии во мечевите од групната фаза.

Доколку Велшаните како третопласирана репрезентација се изборат за 1/8 финалето таму ќе налетаат на еден од победниците од групите Ц или Д, што најверојатно би биле Шпанија и Германија. Ако се пласираат на второто место, копјата ги вкрстуваат со второпласираните од групата Ф во која се најдуваат Португалија, Австрија, Унгарија и Исланд, а пак доколку приредат огромно изненадување и ја освојат групата Б, во 1/8 финалето ги чека третопласираната репрезентација од групите А, Ц, или Д.

*поради моите лоши уметнички способности, морате да ги замислите крилјата на грбот и огнот од устата*

Бејл ја вкуси Лигата на Шампионите оваа година и сега е гладен за уште еден трофеј. Ќе мора ли сам да го носи целиот товар на своите плеќи или ќе добие помош од своите сонародници? Ќе успее ли да зоврие неговата змејска крв? Можат ли велшаните 24 години по Данска, 12 години по Грција и само два месеци по Лестер да приредат уште еден фудбалски шок?

 

[KembaW]

Франција

​

Селектор : Дидие Дешамп

Најголем успех : Освојување на ЕП во 1984 и 2000 и освојување на СП во 1998

Капитен : Хуго Лорис

Најмногу голови : Tиери Анри (51)

Најмногу настапи : Лилиан Турам (142)
​

Домаќинот на ова првенство, а според многумина и главен фаворит за освојување на првенството. Предводени од селекторот Дешамп, кој како играч, а воедно и капитен ги освои Светското првенство во 1998 и Европското првенсто во 2000.

Претходни настапи на ЕП​

Франција на првото ЕП како домаќини го освојуваат 4то место,но не успеваат да се квалификуваат на следните 5 ЕП, се до 1984 кога се повторно домаќини и предводени од најдобриот играч на светот во тој период, Мишел Платини и останатите од таканаречената златна генерација тие за првпат го освојуваат ЕП. Повторно не се квалификуваат за следното ЕП одржано во Германија. На ЕП во Англија 1996, предводени од младиот Зидан успеваат да стигнат до полуфинале. За на следното првенство во 2000 одржано во Холандија и Белгија предводени од нова генерација на квалитетни играчи да го освојат ова натпреварување.На понатамошните првенства не бележат некаков посебен успех.

Состав


Tактичка поставеност
​

Оваа година во тимот недостасуваат Бензема и Валбуена, поради тоа што наводно Бензема го уценувал Валбуена дека во свој посед имал неогва секс- снимка. Валбуена не претставува толгу голема загуба, но без Бензема, Франција требаа да се потпре на Жиру. Франција играат со формацијата 4-3-3.Оваа формација овозможува да дојде до израз нивната динамична средина, која е најдобра во Европа( Погба, Канте, Матуиди, Шнајдерлин) и нивната брзина по крилата со Марисјал,Гризман и Коман, надополнети со еден напаѓач. Последен пат кога биле домаќини, го осовиле и СП и ЕП. Дешамп се соочува со проблеми во дефанзивата, со повредите на Зума, Варан, Матје и суспензијата на Сако. Партнер на Косчиелни најверојатно ќе му биде Мангала, а на бековските позиции ветераните Евра и Сања. Првите 11 ќе изгледаат наверојатно вака:

Распоред на натпреварите​

Петок,10 Јуни
Франција - Романија

Среда, 15 Јуни
Франција- Албанија

Недела, 19 Јуни
Швајцарија-Франција

Репрезентацијата на Франција се наоѓа во групата А заедно со репрезентациите на Романија, Албанија и Швајцарија и е фаворита за првата позиција со која ќе си обезбеди полесен противник во осминафиналето. Очекувањата се огромни за Французите, се помалку од финале би било неуспех. Иако се чини дека ова е најсилниот состав во Европа на хартија, според некои овој состав го нема квалитетот и кохезијата на тимовите од 1984 и 2000.Дали Франција повторно ќе освои првенство на кое е домаќин, ќе дознаеме во престојниот месец.

 

[ob1]

Шпанија


Основана во: 1909
Познати како: La Furia Roja
Селектор: Висенте Дел Боске
Капитен: Икер Касиљас
Највеќе настапи: Икер Касиљас (167)
Најдобар стрелец: Давид Виља (59)
ФИФА ранкинг: 6-ти
​

Во последните две години, Висенте Дел Боске проба да го направи периодод на транзиција во репрезентацијата на Шпанија што е можно по не безболно. После срамниот обид на Шпанија да го одбрани Светското Првенство во Бразил, влегоа во период каде што не беа убедливи во својата игра. Таа игра исто така се одрази на квалификациите за престојното Европско Првенство, кадешто фудбалот којшто го играа беше предвидлив. Чудното е што и покрај тоа што шпанските клубови имаат одлични сезони во Европа, играта на репрезентацијата на Шпанија на ова ЕП е доста сумњива за тим кој цели да го освои ова првенство.

Патот до ЕП 2016


​

Двократниот бранител на шампионската титула Шпанија обезбеди пласман на ЕП 2016 со трет најдобар рекорд во квалификациската фаза, со девет победи и само еден пораз во нивните десет натпревари. Со постигнати 23 погодици и просек од два гола по натпревар во нападот и во одбраната со примени три гола (исто како и Англија) ги прави втора најдобра репрезентација во поглед на примени голови во квалификациите. Единствениот пораз на Шпанија дојде од второ пласираната екипа на Словачка во нивниот втор натпревар на гости, кои изненадувачки ја победија репрезентацијата на Шпанија со 2:1, но Шпанија успеа да се реваншира во Овиедо, единствените два тешки натпревари на Шпанија беа двете победи со идентичен резултат од 1:0 против репрезентацијата на Украјна. Пако Алкасер беше играчот со пет гола кој беше најдобар стрелец за Шпанија во квалификационата фаза - иако не е земен за престојното ЕП. Позади него како втор најдобар е играчот на Манчестер Сити, Давид Силва. Санти Казорла, Педро и Серхио Бускетс се единствените играчи што успеаа да постигнат повеќе од еден погодок во квалификационата фаза.

Повикани играчи


​

За време на нивните триумфални години - ЕП 2008, СП 2010 и ЕП 2012 - Шпанија успеа да еволуира од директен футбал до натпревари со повеќе резервираност и тактички пристап. Двата стила на игра се базираат на идеата на фудбал со посед, но имаат различен пристап.

Иако со двата пристапа беа компетитивни, сигурни и прави машини. Чави Хернандез и Чаби Алонсо беа двајцата чувари на овој стил, но сега Дел Боске ги нема неговите двајца генерали во средниот ред. Дали Шпанија ќе може да игра на истиот начин? Дел Боске мисли така, но Шпанија повеќе наликува како репрезентација која го игра фудбалот на претходната генерација со што го става својот менаџер во умисла. Дали да остане на формулата која му донесе успех на претходните три првенства и да најде играчи со коишто ќе ја попуни дупката на играчите од минатата генерација или па да се отргне од филозофијата на кратки додавања и кратко завземање на теренот и да се врати на подиректниот пристап и забрзаното темпо?

Не само тоа, филозофијата која ја игра оваа репрезентација стана и нивни национален идентите: технички потковани, прецизни, креативни, спортски интелигентни и вешти играчи.. нивниот стил на посед стана како религија, а играчиот од средниот ред се проповедниците на таа религија. Но кои играчи од средниот ред можат да ја редефинираат играта во тимот на Дел Боске? Тиаго или Цеск Фабрегас? Или па играчот на Атлетико Мадрид, Коке?

Играта и ефектот на Атлетико Мадрид може да бидат она коешто е потребно за промена. Дел Боске не е познат како огромен стратег; неговиот успех повеќе се базира на способноста да се справи со тим полн ѕвезди и да изгради силна ментална врска помеѓу играчите преку која што на турнирите ќе им покаже за што стварно се способни. Ова се покажа како одлично во периодод од 2008-ма до 2012-та година но дали после СП 2014 почнаа да се рушат работите. Мора да покаже дека Бразил беше само лош турнир, а не отсјај на лошата состојба во Шпанската репрезентација

Сомнежи има насекаде. На голот, Давид Де Геа, иако се постави како еден од подоминантните играчи во Премиер Лигата, нема загарантирано место во репрезентацијата поради константното присуство на Икер Касиљас. Од друга страна, главните играчи како Серхио Рамос, Фабрегас и Педро се во загрижувачка форма.

Во продолжение, тука е стариот проблем: офанзивниот систем. Дел Боске никогаш не изгради флуидна напаѓачка структура, и често своите најдобри натпревари ги играа без класичен напаѓач (со Фабрегас како "лажна 9ка") или без чисти крила. Алваро Мората во последниве две години изникна како подобро решение од Ариц Адуриз или Диего Коста, кој што воошто не е ни повикан во тимот.

Освен одличниот и инспиративниот Андрес Иниеста, се чини како на Шпанија да и фалат играчи кои што можат да го решат натпреварот со индивидуален потег. Но погрешно би било да се фокусираме само на слабостите на Шпанија, бидејќи имаат и свои значителни предности. Тие се искусен тим, високо компетитивен и со заедничка цел. Секако тука е и огромниот талент кој го поседуваат играчите.

Иако сеуште останува да се види кој ќе почне на голот, одбраната на тимот е очигледно дефинирана: Хуанфран, Рамос, Џерард Пиќе и Жорди Алба е четворката која ќе ја сочинува дефанзивата. Серхио Бускетс заедно со Андрес Иниеста ќе бидат заедно во средниот ред. Давид Силва и Фабрегас ќе имаат важна улога во тимот, безразлика на која позиција ќе стартуваат напред во средината.

Останатиот дел од првата 11ка ќе зависи од тоа која формација Дел Боске ќе ја одбере. Може да игра 4-2-3-1 или 4-3-3 (која во текот на натпреварот лесно ќе може да се трансформира во 4-4-2). Тиаго Алкантара и Коке ќе мора да чекаат на тактичката поставеност и највеќе од тоа ќе зависи дали ќе стартуваат или ќе влагаат од клупа. Но, која 11ка и да биде тимот нема да ја заборави својата филозофија. Дали тоа ќе биде доволно да се освои натпреварувањето повторно, останува да видиме.

Можна прва 11-ка


​

Играч кој ќе изненади на ЕП за Шпанија според мене ќе биде Алваро Мората. Централната напаѓачка позиција била најкомплексната позиција во Шпанија, дури и во нивниот најдобар период. Од дуото Давид Виља-Торес, се проба со единствен истурен напаѓач па дури и со "лажна 9-ка". Во игра која што е контролирана од средниот ред, изборот за напаѓачот стана уште потежок, но сепак не помалце важен. Од кога го напушти Реал Мадрид во 2014 година, Мората во Италија прерасна како напаѓач кој исто така може да игра и како лево крило. Паметен играч, со значително добри дриблерски способности и физички е способен да ја задржи топката во свои нозе кога и да посака. Неговиот профил личи на она кое што и е потребно на Шпанија, но постои чувство дека Мората не е убиствен напаѓач како на времето Раул или Диего Коста. Неговиот скор на постигнати голови не е толку висок, и ова е тоа што е загрижувачко за него. На друга страна, личи како да го има добиено менталитетот за големи утакмици од Јуве. За ова говори неговата одлична игра за Јувентус во ЛШ, како и натпреварот кој го реши во Копа Италија влегувајќи од клупата.

Од друга страна, играч кој ќе разочара на ЕП за Шпанија според мене ќе биде Икер Касиљас. Шпанија знае многу добро, дека "кралевите можат да си ги изгубат своите круни" и ова е тоа што може да му се случи на Касиљас. Се повеќе е очигледно дека неговото време како елитен голман пополека но сигурно поминува. Дел Боске се соочува со слично сценарио со кое се соочи неговиот претходник Луис Арагонс, каде во 2006 го изостави Раул за општото добро на тимпот наспроти индивидуалната репутација на играчот. Дел Боске сега е во слична дилема: дали да го унапреди Де Геа, кој имаше уште една феноменална сезона со Манчестер Јунајтед, или да продолжи со Касиљас? Касиљас како легенда е неприкосновен: 167 настапи, два златни медаљи на Европските натпреварувања и еден златен медал од Светското првенство. Како и да е, магијата што го пратеше Касиљас и кој го правеше еден од најдобрите голмани, ја има изгубено. Многумина почуствуваа дека после срамните партии на СП во Бразил, Касиљас треба да се повлече од репрезентацијата, овој пат тоа може да не биде негов избор.

Кои се очекувањата на Шпанија за ова ЕП? Тешко прашање. За прв пат во последните шест години, Шпанија не се најголеми фавори за освојување на ова натпреварување. Начинот на кој што играа во квалификациите - вклучувајќи го и поразот од Грузија - лошиот перформанс кој го прикажаа на пријателските против поголемите тимови, како и недостигор на голови се оние работи кој ја прават Шпанија да не биде главен фавори. Како и да е, помалите очекувања од друга страна може да бидат и предност. Ќе се соочат со тешки противници во групната фаза, ако излезат како победници, сигурно дека ќе го кренат нивото на игра. Не треба да се потценуваат, статусот на актуелни шампиони треба да биде доволен доказ за тоа.

 

[Beck's]

Албанија
Shqipëria

Основана во: 1930
Селектор: Џани де Биаси
Капитен: Лорик Цана
ФИФА ранкинг: 42
​

После 86 год од своето постоење на фудбалската карта, Албанија стигна до најголемиот свој успех пласирајќи се на Европското Првенство кое почнува за нецели 24ч. Во група каде што влегоа со минимални шанси за такво нешто покрај една Португалија, Србија, Данска па и Арменија успеаа да се пласираат директно како второ пласирани. Долго очекуваниот сон конечно стана реалност, милиони албански срца ширум светот ќе чукат заедно на ова европско, за да кој знае можеби и потрае тој сон повеќе од 3 натпревари од групите.

Распоред на натпревари и очекувања:
​

11.06.2016 Албанија - Швајцарија
15.06.2016 Франција - Албанија
19.06.2016 Романија - Албанија

Жрепката сакаше Албанија да се падне во иста група со домаќинот Франција, супер квалитетниот тим на Швајцарија каде настапуваат голем број Албанци, а најинтересен ќе биде братскиот дуел Таулант Џака и Гранит Џака. И последни остануваат Романците. Реално за Албанија секој гол, секој освоен бод ќе биде успех и од огромно значање, 3то место би било супер, ама фудбалот не би бил таков ако нема изненадувања и не се верува во "невозможното". Истото го мисли и легендата Ерик Кантона

Па со среќа нека им е и да си го повторат успехот на комшиите од 2004.

FORCA SHQIPËRI

​

 

[Invader]

РУСИЈА

​

Русија, иначе 27. репрезентација по Фифа рангот, ќе настапи на своето 4. последователно ЕП и на 6/7 ЕП по осамостојувањето од СССР. Најголем успех на Русија е освојување на ЕП 1960 година од времето на СССР, победувајќи ја Југославија по продолженија со 2:1. Интересно е што првенството било играно баш во Франција. Русија беше можеби најголема сензација на ЕП 2008 година, кое беше играно во Австрија и Швајцарија, каде го остварија својот најголем успех по осамостојувањето. Русија предводена од Гус Хидинк тогаш стигна до 1/2 финале откако поминаа група со Шпанија, Грција и Шведска. Русија почна доста лошо со висок пораз против Шпанија (4:1), но потоа со две чисти победи без примен гол против Грција (1:0) и Шведска (2:0) стигнуваат до 1/4 финале. Таму се сретнуваат со фаворизираната Холандија. Русија поведе со голот на Павличенко и изгледаше, дека повторно ќе победат без примен гол, но Холандија израмни со голот на Ван Нистелрој неколку минути пред крај. Во продолженија Русиве беа многу подобар противник и со головите на Торбински и Аршавин, кој не настапуваше на првите две утакмици заради повреда, стигнуваат до 1/2. Таму повторно се сретнуваат со Шпанија, која доста среќно на пенали помина против Италија. Шпанија со победа од 3:0 уште еднаш докажа дека е премоќна за Русија и другите европски репрезентации.

ПАТОТ НА ЕП 2016

​

Русија во квалификациите за ЕП се наоѓаше во групата Г, преку која со директен пласман обезбедија настап на ЕП. 6 победи, 2 ремија и 2 пораза беа доволни за второ место пред Шведска и зад Австрија, која доминираше во групава.
Русија квалификациите ги започна со најплатениот селектор во тоа време Фабио Капело, кој започна со победа против Молдавија и реми со Шведска на гостински терен. Потоа следеа низа очајни резултати пред се ремито против Молдавија на домашен терен не смееше никако да си го дозволат. Следеше очекуван пораз против Австрија, кај што беа поразени со 1:0. 5. коло Русија гостуваше во Подгорица против Црна Гора. Уште една лоша претстава на руската репрезентација, која беше спасена од домашните навивачи, кои правеа нереди на трибини. Мечот беше прекинат во 67. минута и 0:3 службена за Русија. Со тоа му беше дадена уште една можност на Капело, за да остане како селектор на репрезентацијава. Ништо позитивно не донесе ни наследниот меч против Австрија дома, уште еден пораз со 0:1 во Москва и отказ за Фабио Капело, кој беше наследен од тренерот на ЦСКА Москва Леонард Слутски. Русија со Слутски одма покажа подобра игра и ги забележа сите можни 4 победи до крај. Главен играч последниве 4 натпревари беше играчот на Зенит Артем Ѕуба, кој постигна 6 гола и со вкупните 8 го делеше првото место на стрелци во квалификацискава група Г заедно со Ибрахимовиќ.

ГРУПА И ПОПИС

​

Русија на првенствово ќе настапи во групата Б, заедно со Англија, Словачка и Велс. Руската јавност секако очекува пласман во нокаут фаза, иако имаат доста изедначена по квалитет група освен Англија, која е фаворит број еден.

Од пописов може одма да се истакне дека еден од најдобрите руски играчи, Алан Ѕагоев, ќе го испушти првенството заради повреда. Тука секако се голманот и капитенот Игор Акинфеев, бесмртните браќа Березутски заедно си Игнашевич и секако Роман Нојштадер, кој ни сам не знае што сака. Русин роден во Украина, цел живот живее Германија, кај што почнува да се занимава со фудбал во Мајнц. Подоцна направи трансфер во Менхенгладбах за кој играше 3 сезони, за да 2012 потпише за Шалке како слободен играч. Прво сам има изјавено дека би сакал да настапува за Украина, но бидејќи сеуште немал украински пасош и дозволи на Германија бргу да реагира и да го повика да настапува за нив. 2012 дебитира за Германија, за која после тоа забележува само уште еден настап. Новите правила на Фифа, која им дозволува на фудбалерите да сменат државјанство ако имаат 3 или помалце настапи и овозможи на Русија да го повика Нојштадер за престојното ЕП. Деби настап имаше пред само неколку дена во поразот на Русија против Чешка.

Од Слутски можеме да очекуваме 4-4-2 или 4-4-3 на првенството. Болдираните играчи се скоро сигурни во прва постава: Акинфеев; Смолников, В. Березутаски/Нојштадер, Игнашевич, Комбаров/Шчеников; Денисов, Шатов, Широков/Головин; Ѕуба, Кокорин; Смолов. Секако најголема дилема е левата бековска позиција и тоа само заради тоа што Комбаров има некои проблеми со повреда, иначе стандарден беше во квалификациите. Битно кум Широков да игра да ги ебе сите од A do Zh. Да беше присутен Ѕагоев, тогаш немаше да има дилеми дека ќе играа 4-4-2 со Ѕагоев на средина наместо Смолов. Вака може да очекуваме малце поофанзива варианта, иако нема да ме чуди да го видиме Нојштадер место Смолов на првиот дуел против Англија.

Предвидување: испаѓање од група со еден освоен бод.​

​