И во 2014 полицијата ќе се модернизира, армијата ќе преживува
(Буџет МВР : МО – 2:1)
Само 5,3 милиони евра за следната година има планирано владата за НАТО интеграциите на aрмијата. И годинава, според планираните пари, модернизацијата на армијата каска зад онаа на полицијата. Во буџетот за 2014 година, МВР планирано е да добие 160 милиони евра, aрмијата, пак, за разлика од полицијата, ќе кубури со 96 милиони евра. Најмалку пари од секторот одбрана и безбедност на државата, планирани се за Агенцијата за разузнавање, тие 2014 ќе треба да ја преживеат со 2,5 милиони евра.
Во годината што изминува полицијата се поднови со 250 возила од марките „јети“ и „спарк“, беше најавено купување на нови водени топови, изработка на софтер за мобилни телефони, беше пуштен во употреба центарот за управување и контрола на сообраќајот, а беа обезбедени и ласерски радари и друга нова опрема за потребите на МВР.
Армијата, пак, 21 роденден го прослави во стари чизми и излитени униформи за војниците и со застарена опрема.
За реформи во
АРМ во 2014 година се планирани 1,7 милиони евра, а за модернизација на армијата околу
115.000 евра. Во буџетот за 2014 година најголеми средства за полицијата се под ставката безбедност и тоа 125 милиони евра, овде спаѓаат централните полициски сили, граничната и сообраќајната полиција, сите сектори за внатрешни работи, без државната безбедност. Билдањето на буџетот на МВР, за сметка на армијата, за поранешниот министер за одбрана, Јован Манасијевски, е успешен обид на власта за инструментализација на полицијата.
- Неколкугодишната практика за редистрибуција на безбедносниот колач на штета на армијата е во несразмерна полза на МВР и е јасен израз на владината политика на тотална инструментализација на јавните ресурси. Имено, според логиката на оваа влада, инвестирањето во модернизација и опремување на армијата не и носи никакви конкретни политички и економски бенефити, додека, пак, инвестирањето во опремувањето на МВР носи мултиплицирана добивка преку енормното зголемување на потенцијалите за воспоставување контрола и притисок врз тековите на целокупниот економски и политички живот во земјата – вели Манасијевски за Плусинфо.
На прославата од 21-годишниот јубилеј на АРМ, началникот на Генералштабот, Горанчо Котевски, во својот говор истакна дека државата мора да вложува во модернизација на армијата.
- Мора да вложуваме во одбраната, мора да вложуваме во модернизацијата затоа што со тоа вложуваме во безбедноста и иднината на нашата држава. Подготовки за одбрана и модернизација се вршат во мирновременски услови, а не кога на тоа сте принудени. Одбраната, безбедноста, мирот немаат цена – истакна Котевски во август годинава.
Армијата за догодина има 6 милиони евра повеќе од годинава. Дали планираните пари за 2014 година ќе удрат повторно врз модернизација и опрема на армијата, со што теоретски би можело да се загрози безбедноста на државата или да бидеме искритикувана од НАТО, се обидовме да добиеме одговор од генералот Котевски, но неговиот портпарол ни кажа дека тој до понеделник ќе биде отсутен.
Во стратегијата за одбрана и долгорочен план за нејзиниот развој до 2020 година АРМ треба да добие повеќе од 130 милиони евра со пропорционално зголемување во годините што следуваат, вели поранешниот припадник на полициските специјалци генерал, Стојанчо Ангелов.
- Но очигледно владата кренала раце од НАТО интеграциите на земјава, па повеќе и одговара да продолжи да ја злоупотребува полицијата за политички цели. Од парите за 2014 кои ќе и бидат доделени на полицијата верувам дека поголем дел од нив ќе бидат искористени за следење на политички неистомисленици.
Владата нема потреба да инвестира во армијата, бидејќи оваа министерство веќе години наназад го контролираат од ДУИ, па со самото тоа што најголеми пари од секторот за безбедност и одбрана се слеваат во МВР укажува на фактот дека најголем дел од Македонија е полициска држава - вели Ангелов за Плусинфо.
Во изминативе 9 години, најголем буџет армијата имаше во 2009 година, тогаш на Министерството за одбрана му беа доделени 119 милиони евра, армијата со најмалку пари располагаше во 2012 година, кога и беа доделени 86 милиони евра.
И најновата вест на денот нов Магистер од областа на безбедноста -министерот за напад на Р.Македонија
http://brif.mk/makedonija/magistrira-minister-za-odbrans-talat-djaferi/
