Еднаш човек ќе се реши да излезе на протести, ќе заврне и сите ќе се разотидат. Него дај да видиме како изгледаат протести во Барселона
Полицијата безмилосно тепа, а демонстрантиве не им се даваат и буквално креираат жив ѕид. Две недели вака не можеа да ги тргнат од улица. И си се чудам, што мака ги натера луѓево да трпат ваков ќотек, да бидат волку фанатични во своите барања. Кога гледам, невработеноста во Шпанија достигнала 20 %, а само кај младите изнесувала 45%. И кога го прочитав ова, ме фати смеа и си викам - A бе aj заеби ги ти Шпанците, ние Македонците сме стоици, oдносно се водиме по паролата - Не можат они да не ебат толку многу, колку што ние можеме да издржиме.
А сега читам дека и претходно имало претепување до смрт од страна на полицајци во 2006 та. Па ние да не видевме дека протести за такво нешто можело да се организираат, како на пример во Грција, којзнае дали ќе ни текнеше воопшто да се собереме.
Идеме сега со македонски протести
Значи да се разбереме, не сакам да бидам зајадлив со видеава. Дечките кои што протестираат упорно, веќе три дена се единствената светла точка во нашава македонска апатија и дефетизам. Ќе кажам само напред, и пак ќе дојдам на митингот во петок, се надевам дека ќе биде помасовно и ќе бидеме погласни. Колку и да тврдиме дека масовноста не е битна, на крај секогаш е битна. Затоа што колку е помасовно, властите толку повеќе ќе бидат уплашени и толку помалку ќе можат да делегитимизираат и да етикетираат. Јас немам проблем на протестот да доаѓаат политичари од било која партија, се додека протестот е граѓански и не се вадат никакви политички пароли. А што се однесува до масовноста, не е крив само менталниот склоп на овој народ. Постојат и други битни фактори, како на пример невладини организации кои би стоеле како организатори на ваков протест и независни телевизии кои би му дале соодветна медиумска поддршка и покриеност на протестот. Проблемот во Македонија е што невладините организации немајќи начини како да се финансираат, сите се налепени на политичките партии и одработуваат за нив, односно политичките партии сами си формираат невладини организации за свои потреби. Така да нема да ме чуди и ако се организира протест за поддршка на полицијата. Иста е сликата и со медиумите, секоја политичка партија си има по два - три медиума, кои секој настан си го толкуваат онака како што им налага нивната партија.
