Струмица ќе се гасифицира следната грејна сезона
Струмичани дадоа зелено светло на идејата за гасификација на општината. Бизнис заедницата, јавните институции, домаќинствата и земјоделците кои учествуваа на јавната расправа го поддржаа проектот за гасификација кој треба да се реализира до октомври идната година и кој ќе обезбеди заштеда и до 50 насто од досегашната потрошувачка за затоплување.
„Многу е напредна идејата особено што ние сме земјоделски крај. Гасификацијата ќе овозможи чиста средина, еколошки здраво производство, без употреба на пестициди и други хемиски средства“, рече земјоделец.
„Според нашите пресметки, метанот е најевтин енергенс во светот и гасификацијата ќе ни донесе заштеда во енергенсите меѓу 20 и 30 насто и тоа ќе не направи поконкурентни на пазарот“, додаде бизнисмен од Струмица.
Проектот на виртуелен гасовод со кој гасот ќе се носи од гасната централа во Петрич Бугарија и ќе се дистрибуира во мрежата долга 13 километри, тежи 4,5 милиони евра.
Овие средства општината ќе ги обезбеди преку кредит од Светска банка, а гасот за крајните потрошувачи ќе чини околу 20 денари за метар кубен.
„Ќе ја направи Струмица многу поинтересна за инвестирање, ќе го направи многу поконкурентно нашето стопанство за во иднина, ќе ја направи рентабилноста на живеачката, на јавните институции, на домаќинствата, на стопанството, на земјоделството, многу попрагматична, практична и економична“, рече градоначалникот Зоран Заев.
Во првата фаза ќе се гасифицираат јавните институции и стопанството, во втората обработливото земјоделско земјиште и во третата фаза домаќинствата.
lee: